Tradisi Malam Duo Tujuah Ramadhan di Nagari Talawi, Kota Sawahlunto

 

Oleh : Saskia Putri Nabilla

Mahasiswa Sastra Minangkabau, Universitas Andalas

 

Bulan Ramadhan adolah bulan dimano saluruah umaik Islam tunggu untuak dijalani basamo-samo. Bulan ko adolah bulan nan panuah jo keberkahan jo kaindahan. Masyarakaik nan manjalani puaso, biasonyo paliang katuju katiko manjalani bulan ko karano katiko ko lah pahalo balipek gando banyak nan bisa didapek. Katiko bulan puaso datang, banyak caro nan biaso dilakuan dek masyarakai dalam manyambuiknyo, ndak takacuali di Minangkabau. Minangkabau ko adolah salah satu kaum atou suku di Indonesia nan masyarakaiknyo baagamo Islam. Sasuai jo pegangan adaiknyo, Adaik Basandi Syarak, Syarak Basandi Kitabullah. Dek karano itulah, masyarakaik Minang ko tantu mampunyoi tradisi-tradisi nan unik katiko manyambuik bulan Ramadhan ko, diantaronyo ado nan mambuek lamang, ado nan marandang dan ado pulo nan manyabuik bulan Ramadhan jo mandi-mandi nan disabuik jo balimau.

Manjalani bulan Ramadhan ko tantu babeda jo manjalani kahidupan sahari-hari. Jikok hari biaso wak bisa makan jo minum kapan sajo jo dimano sajo, mako di bulan ko lah wak manahannyo. Bulan Ramadhan ko adolah bulannyo ibadah untuak umaik Islam, dimano katiko tu urang manjalani puaso sambia manahan makan jo minum mulai dari sasudah sahur sampai tibonyo imsak, dimano samo halnyo indak makan sabalum matohari tabik sampai tanggalamnyo matohari. Salain itu, dek mahan hauih jo lapa ko, banyak aktivitas ibadah lainnyo nan dilakuan di bulan Ramadhan ko sarupo ibadah mangaji, solat sunah, mandanga ceramah dan lainnyo. Adapun keunikan lain katiko bulan Ramadhan ko adolah menu makanan nan babeda dari hari biasonyo. Katiko bulan ko tibo, ado babagai macam makanan nan dijaga dek urang pado sore hari sabalum babuko. Mulai dari es-es nan unik-unik, onde-onde, kolak, kue-kue dan masih banyak nan lainnyo. 

Ndak hanyo parkaro manyambuik Ramadhan, makanan-makananyo, dan lain sabagainyo, tapi ado salah satu malam nan paliang di tungu-tunggu dek umaik Islam tantunyo iolah banamo malam duo tujuah. Malam duo tujuah ko adolah malam nan identik disabuik jo malam lailatul qadar, dimano bulan ko iolah bulan nan labiah elok dari pado saribu bulan. Manuruik babarapo hadist, malam lailatu qadar ko ado dalam rentang waktu sapuluah hari tarakhir di bulan Ramadhan. Katiko malam ko tibo, mako babagai caro nan dilakuan urang untuak mandapek berkah malam ko. Salah satu nagari nan mampunyoi tradisi katiko malam duo tujuah ko datang adolah Nagari Talawi, Kota Sawahlunto, Provinsi Sumatera Barat. Di nagari ko, ado babarapo kegiatan nan biaso dilakuan dek masyarakaiknyo katiko malam duo tujuah ko.

Kegiatan partamo adolah malam iktikaf di musajik. Katiko lah salasai tarawih, biasonyo babarapo jamaah ado nan mamiliah untuak tingga di musajik dan kamudian mangaji basamo. Mangaji atau tadarus basamo ko adolah suatu bantuak kasungguahan dirinyo nan nio bana untuak mandapek berkah jo hidayah malam ko. Jamaah nan mangaji basamo tadi akan tadarus basamo sampai tangah malam. Salasai tadarus, jamaah nan tingga akan lalok di musajik dan sahur basamo bisuaknyo. Ado hal nan unik katiko ko, iolah katiko jamaah nan lalok di musajik tadi, nyo pulo nan akan manjagoan urang sahur kaliliang di sakitar tampek tingga musajik tu. Jadi, urang nan malakukannyo yo sabana baniek untuk mandapek pahalo gadang jo caro babuek kebaikan tu. 

Adopun kegiatan lainnyo, dulunyo ado maiduikan lampu obor atau lilin di muko rumah. Rumah nan maiduikkan lilin ko dipicayo akan didatangi malaikek dan didoakan kebaikan karano rumah ko dalam keadaan sunyi di tangah lampu temaram dek urang rumah nan sadang mangaji jo sumbayang. Salain tu, katiko malam sapuluah tarakhir Ramadhan ko diadokan pulo MTQ  tingkek nagari. MTQ atau Mushabaqah Tilawatil Qur’an nagari ko adolah kegiatan rutin di malam Ramadhan nan diadokan sakali satahun. MTQ nagari ko biaso diutus dari surau-surau nan ado di nagari tasabuik. Dari utusan surau tu lah nantinyo akan manjadi tilawatil utusan desa di MTQ tingkek kecamatan nantinyo.

Itulah babarapo bantuak kegiatan atau tradisi di malam duo tujuah Ramadhan di Nagari Talawi, Kota Sawahlunto. Samoga informasi ko dapek mambantu pambaco dalam mangatuhui tradisi-tradisi nagari ko. Sakian, tarimokasih.