MANTRA SABAGAI BANTUAK PUISI LAMO NAN TUMBUAH DI BUDAYO MINANGKABAU

 

Oleh : Saskia Putri Nabilla

Mahasiswa Sastra Minangkabau, Universitas Andalas

 

Minangkabau mamiliki sastra lisan nan masih bakambang sampai saat ko. Salah satu bantuak sastra lisan ko adolah mantra. Mantra marupoan salah satu sastra lisan tatuo di Minangkabau nan diwarisi dari muluik ka muluik. Dalam satiok kegiatan ataupun acara, masyarakaik ndakkan pernah lapeh dari mantra. Manuruik Djamaris (2001:4) puisi dalam sastra Minangkabau dapek digolongkan dalam babarapo jenis, yaitu mantra, pantun, talibun, jo syair. Salanjuiknyo, Djamaris, mangatokan mantra sabagai suatu gubahan bahaso nan diresapi oleh kepercayaan kapado dunia nan gaib jo sakti. Bahaso dalam mantra mampunyoi seni kato nan khas, kato-katonyo dipiliah, irama jo isinyo dipatimbangkan sadalam-dalamnyo. Kini ko, mantra lah jarang ditamui, sabab babarapo ahli atau bisa disabuik dukunnyo, lah banyak nan maningga jo ndak lai diwarisi ka urang lain atau panaruihyo. Meskipun mantra masih bakambang di sabagian masyarakaik, namun eksistensi dari mantra itu surang indaklah bisa digunokan oleh sado urang, karano hal ko manyangkuik pulo jo kepercayaan urangnyo. Mako dari itu, mantra nan lah ditulihkan, akan manjadi sabuah karya sastra sajo. Adopun babarapo contoh mantra iyolah sabagai barikuik :

1. Mantra supayo indak takuik manghadapi urang lain

Bismillahirrahmanirrahim

Zatsyadun namanya aku

Si abud si rausin nama baju aku

Bamulo zat dengan sifat kadim kaduonyo

Dima kadimnyo, di kito

Hu hakk (sambia mahantak kaki)

2. Mantra pambarasiah diri

Bismillahir rahmanir rahiim

Ikolah do’a atau tawa untuak mambarasiahan diri

Darah yang sabananyo merah,

Jikok hitam dibaliak merah

Jikok merah tolong dijaniahan

Indak ado luko nan ndak ado ubeknyo

Capek cegak capek lapang ati dari sagalo panyakik

Baliaklah kau katampek kau

Jaan kau kumuahan yang patuiknyo barasiah

Sagalo sakik ndak ado yang indak jaleh ubeknyo

Ado sakik ado ubeknyo

Jikok sakik indak bisa cegak sakotiko

Ado usaho ado niek

Bia nak cegak bia nak sanang badan, sanang ati

sanang sado apo nan taraso

untuak itu bamintak dan bamohonlah ka nan ciek

karano sado panyakik tibo ateh kuaso nan ciek

nan ubeknyo tibo dari nan ciek

cukuik sakali sakiak tibo

ampun, ampun kan denai ya rabbi

Barakaik laa ilaaha illallah 

3. Mantra manuai padi

Hai si lansari-bagindo sari

Si lansari-sari bagadun

Angkau banamo-banyak namo

Si lansari-ka aku tuai

Urang Kinari-pai barameh

Urang Singkarak-pai mandulang

Si lansari aku-jaanlah cameh

Ka ku tuai-ku bao pulang

Hai si lansari-bagindo sari

Molah kito-pulang ka rumah

Sarato jo rajo-rajo angkau

Panggia mamanggia-molah angkau

Kabik mangabik-molah angkau

Dari Siluak-dari Siatang

Dari Agam-dari Batipuah

Dari Kasiak-Sumaniak

Taluak Ranah-rang Sungai Pagu

Rang nak padi-tak baampo

Rang nak ameh-tak batintiang

Hai si lansari-bagindo sari

Marilah kito-pulang ka rumah

Sarato jo rajo-rajo angkau

Nan babaju-hadun tamadum

Bakain kambang-akan marindu

Biliak dalam-lah mananti

Kalambu tuai-lah mananti

Si upiak itam-lah mananti

Bujang kinangan-lah mananti

Hu huu huu si lansari aku

4. Mantra menyemai baniah

Allahumma salli ‘ala - Muhammad

Daulu alun - banamo padi

Banamo - nur Allah

Urek disabuang - bidodari

Camin tasari - namo batangnyo

Induang barek - namo daunnyo

Ganto sarugo - namo bungonyo

Mako batambun-tambun - tambunlah urek

Camarlang - di dado Adam

Langsuang dijawek - Jibirain

Pancaran insan - bagindo insan

Insan banamo - akia saman

Dalam gurijah - waliullah

Salalluhu alaihi wa salam

5. Mantra pajauah harimau

Ra Ali – hai Ali

Aku tahu angkau jadi

Mani Ali asa angkau jadi

Hai Ali si jo Ali takalo parantian

Aku tahu di asa angkau jadi

Mani Ali asa angkau jadi

Takikan ka kayu kayu bona

Tungkuih jo daun lukomu

Hai si baritiak

Datuak Itam Rajo Bagindo Ali

Palimo gagah hak wah

Onam kayu si dusun tanah

Jauah angkau dari siko

6. Mantra pakasiah

Assalamualaikum warahmatullahi wabarakatuh

Hak biso bukannyo biso

Biso Allah labiah tajam dari pado padang

Labiah angek dari pado api

Labiah biso dari pado ipuah

Hai sahabaek nan barompek

Jagolah angkau, bangunlah angkau

Untuak manjapuik ruah sumangai si...

Kok dapek si anu sodang lalok

Sentakkan ubun-ubunnyo

Sentakan ampu kakinyo

Hantakkan ka hati jantuangnyo

Kasiah sayang cinto nan rahim kapado aku

Kabua barakaek laillaha illallah

7. Mantra paubek sakik

Bismillahirohmanirrahim

Barang nan tajam lagi tumpu

Barang nan runciang lagi mumuak

Madok kapadoku

Kalau pabudian solok sanjo rayo

Simambang kuniang simambang paneh

Lagi tatahan lagi tatangkih

Di tahankan Allah di tangkihkan Muhammad

Ditangkih bagindo Rasulullah

Berkat doaku lailahaillah

 

8. Mantra manghadapi musuah

Qul kato Allah

Ana kato Muhammad

Seperti kato Bagindo Rasulullah

Air nua hati rangkungan aku

Ya bani saribani

Paku runduak paku urano

Paku erang rang galahan

Tunduak sakalian urano

Aku surang mengalahkan.

9. Mantra pengubek luko baka

Dulang-dulang tapi aiae

Inggok di tanah tumbuah

Tulang indak latiah

Langkak luluah

Palagokan bangkak si Anu

Kabua barakat la ilaha illallah

10. Mantra gasiang tangkurak

Hei Inyiak Sialebace nan diam di pintu langik

Hei Inyiak Sialelinta nan tagak di pintu bumi

Mangko turun sarato patuih mangko tibo sarupo kilek kabadan diri si anu ( namo urang nan dituju )

Baolah pasan dari ambo

Pasan sarato gasiang tangkurak

Kok nyo lalok tolong jagoan

Koknyo tagak suruah bajalan sujuik nyo dikaki ambo

Gasiang banamo …………..( namo urang nan punyo tangkorak )

Mati tabujue basimbah darah

Kafan kaganti talinyo

Putuihlah gasiang putuih makrifat

Tabang malayang ka rumah si anu

Itulah babarapo contoh mantra nan ado di Minangkabau. Sabananyo, masih banyak mantra-mantra lain nan ado di budayo Minang, karano mantra ko tumbuah di satiok kalompok masyarakaik. Sahinggo, hampia tiok daerah di Minangkabau mampunyoi mantranyo masing-masing. Adopun munculnyo mantra, biaso dipengaruhi dek ba a kabutuhan dan kaparluan masyarakaik satampek. Mako dari itu, babedanyo tiok daerah, mako mantranyo pun akan babeda. Akan tatapi, mantra hanyolah sedakar ucapan nan dibaluik jo kepercayaan sasaurang. Talapeh bana atau indaknyo dari mantra, tagantuang jo ba a urang-urang nan manilainyo. Alangkah baiaknyo, kito langsuang badoa sajo ka Tuhan nan kuaso, sabab kapado Allah lah kito mamintak partolongan.