Adiak balain hati

Ditulis oleh Jaya Putra Ramadhan, 

Mahasiswa Universitas Andalas, 

Fakultas Ilmu Budaya,

Jurusan Sastra Minangkabau.

“daa, bilo jadinyo uda ka maminang denai, bia tau pulo urang gaek denai kalau uda tu lai sarius” kato imar. “tanang se lah diak, uda pasti ka maminang adiak nyo, tapi kalau kini uda alun siap lai do. Jadi, tunggu se lah” jawab ujang.

Ambo alah bapacaran jo imar samaso dari sakolah lai, SMA labiah tapek nyo. Ambo basobok jo imar katiko baru masuak SMA, antah baa imar tu dimato ambo sapasial bana walau rupo nyo indak sarancak bungo kambang, parangai nyo indak sarupo padi marunduak tapi ambo tetap sajo sanang maliek imar tu. Sadari SMA kami bajadi banyak kanangan yang indak bisa di lupoan, sasudah ambo tamat SMA, ambo langsuang karajo di bengke mamak ambo, samo-samo awak tau sajo,  gaji di bengke tu bara bana nyo, ndak kacukuik untuak babini do. Alah tunggak-tunggik ambo manjalehan ka imar bahwasonyo gaji ambo ketek, tapi si imar ko acok bana manyasak untuak tibo karumah nyo. 

Alah masuak tigo pakan ambo indak dapek kaba tantang imar, antah baa lah kini kaba baliau. Tatapi tadi pagi tibo-tibo se kawan ambo nan banamo ilham mangecek an. “jang, lai masih jo imar juo ang lai, baa kok patang malam den liek imar jalan bapaguik an baduo jo si Rido anak juragan lado kampuang sabalah”. Tangiang-ngiang dek ambo kato-kato nan kalua dari muncuang si ilham tu, lah ambo cubo manalepon imar tapi indak pernah di angkek dek baliau.  Katiko ambo tibo ka rumah si imar. Pas bana si Rido anak juragan lado kampuang sabalah sadang batamu karumah imar, kironyo batua kato si ilham, imar sadang galak-galak manih baduo jo Rido dihalaman rumahnyo.. Pas ambo sawak mereka baduo dan manjalehan ka si Rido tadi kalua ambo tu pacar imar, tibo-tibo imar mangecek “uda sia, ndak ado den kenal jo uda do, jan gaduah den. Iko calon laki (suami) den, jan gaduah kami baduo” 

Mandanga kato-kato nan kalua dari muncuang imar nan sarupo itu, langsuang lamah jantuang didado, sakatiko mati raso badan ko, tengkak jalan katiko pulang, sarupo pareman mabuak tangah malam. 

Pagi nyo pailah ambo ka rumah ilham kawan ambo tadi untuak mancaritoan a nan tajadi, ambo caritoan lah kajadian nyo. Sasudah ambo caritoan di jaweklah dek ilham sarupo iko “alah tu jang, pidusi takah itu dak usah di agiah hati, gasiangan se nyo lai. Kok iyo takah itu kato nan kalua dari muncuang imar, lah patuik pulo ang mancilakoi nyo tu, dak elok padusi nan takah itu do, dari pado sakik hati taruih ang maliek inyo baduo, kok iyo nio  ang ma lapehan dandam nan di hati, den agiah alamaik urang cadiak nyo”.

Duo pakan sasudah kajadian itu, manalepon baliak si ilham ko, ma agiah tau kalau si imar ka baralek awal bulan bisuak. Mandanga imar ka baralek naik lah kalang ambo baliak. Padahal sabalun nyo ambo alah mancubo marelaan si imar. Dek ilham pernah ma agiah alamaik urang cadiak nan pandai main gasiang sakti tu, pai lah ambo ka alamaik nan ditulihan ilham tu. Sasudah basobok jo urang cadiak tu di agiah lah ambo syarat-syarat untuak malakukan ritual itu. Syarat-syaratnyo sarupo (1). Kain putiah sakabuang, (2). Kain hitam sakabuang, (3). Kain merah sakabuang, (4). Pisau nan masih baru, (5). Banang tujuah warna. (6). Kumayan putiah, (7). Baso-basi ka dukun sarupo pitih, (8). Gasiang Tangkurak. Salain syaraik nan formal , ado pulo syaraik nan khusus sarupo potongan kuku, rambuik, bakeh nasi punyo imar, sa ganggam tanah bakeh pijak an, foto imar nan ka di jadian sabagai tujuan sijundai.

Sasudah langkok syaraik-syaraik nan di minta dek urang cadiak, ambo baliak ka rumah baliau nan batujuan untuak ma agiah syaraik-syaraik nan di minta dek baliau. Malam nyo ambo jo baliau (urang cadiak) sarato kawan dari baliau tadi pai ka kaki bukik nan jarang di lalui dek warga, katiko proses sijundai, ambo maliek dukun tu mangaluaan sampelong (alat musik tiup Minang). Sampelong nan biaso di sabuik dek urang lain, kalau di kampuang ambo namonyo sodam. Sasudah mangaluaan sodam tadi, si dukun malakekan potongan kuku, rambut, sarato siso nasi dari si imar ka ujuang sodam, labiahnyo dilakekan ka gasiang tangkurak, lalu di asok an jo kumayan (kemenyan). Sasudah itu, sa ganggam tanah bakeh pijakan si imar diserakan di tampek baka kumayan. Foto imar dilatakan di muko gasiang nan ka di puta-an. 

Katiko syaraik-syaraik tadi alah digabuang, sodam diambuih dan diikuikan jo urang yang mamainan gasiang tangkurak. Sasudah itu, dendang sodam dinyanyian sambia ma imbau namo atau gala dari nan punyo kapalo tangkurak tadi.  banyak nan di baka dek baliau, ambo pun ndak lo tau a gunonyo mambaka syaraik-syaraik tu do. Alah ba jam-jam mato ambo maliek muncuang dukun nan sadang mancaloteh sarupo muncuang gaek ambo katiko berang, antah a nan di sabuik an dek dukun tu tatapi nan ambo tau baliau sadang baco mantra. Katiko lah salasai, ambo disuruah pulang dek baliau dan disuruah untuak indak basuo jo imar dalam sapakan iko, karano baliau takuik ambo nan manjadi sasaran. 

Tigo hari sasuda ritual malam tu, manalepon baliak si ilham ko, Baliau mangecekan kalau parangai si imar sarupo urang gilo, stress, manjek-manjek dindiang, makiak-makiak. Mandanga itu ambo maraso sanang saribu kali sanang, tatapi dalam hati ketek ambo sadiah sasadiah-sadiah nyo, padusi nan ambo cinto barubah parangai nyo manjadi sarupo itu. lah ba bulan-bulan imar takah itu, lah banyak pulo urang cadiak nan tibo ka rumah nyo untuak ma ubek an, tatapi imar dak juo kunjuang cegak. Sampai saat iko ambo dak pernah ma liek si imar sacaro langsuang, hanyo mandanga kecek-kecek tetangga ambo sajo. Karano panyakik imar tu alah di katahui dek urang kampuang sakitar.