URANG SANTIANG

Riskan Aljufri
Mahasiswa Jurusan Sastra Minangkabau, Fakultas Ilmu Budaya, Universitas Andalas


Biasonyo pado jaman dulu urang pai kama kama pastilah bajalan kaki, itu pulo yang dikarajoan jo angku yang biaso disabuik angku Mandu Gudang. Angku tu tingga di Pasisia, Bayang Utara, Kanagarian Koto Ranah. Di Kanagarian tu angku menjabat sebagai wali nagari, biasonyo yang dijadian wali nagari iyo lah urang yang cadiak, tau raso jo pareso sarato urang yang patuik dijadian pemimpim.Dalam sakali sabulan angku pasti pai ka Solok untuak maliek bininyo di Solok, urang jaman dulu kebanyakan punyo bini labiah dari ciek. Jadi bajalan kaki dari Pasisia ka Solok lah biaso angku lakuan, pastinyo malalui bukik bukik salah satunyo Bukik Sileh
Sampailah di suatu hari yang biasonyo angku pai ka Solok, waktu tu sekitaran taun 30an wakatu Indonesia masih dijajah. Pai lah angku ka Solok mambaok perlengkapan untuak rumah bininyo yang disolok satiok bukik nyo lewat an jo angku, biasonyo di bukik banyak urang panyamun atau urang yang suko manjarah apo yang di baok. Dek angku ko urang lah biaso pulang baliak dari darek ka bayang, jadi tau lah angku tampek yang aman untuak di lewat an yang ndak ado panyamunnyo. Ndak taraso se kironyo ampiang sampai lah angku ko tingga malewat an Bukik Sileh se lai sesudah tu dakek lai jalan ka rumah kecek angku Mandu Gudang ko, lah agak sero lah perasaan dek nyo karano ampiang ka tibo lai.
Akhianyo lah tibo pulo angku ko di Bukik Sileh, kironyo di di bukik tu ado panyamun urangnyo rami. Nyo ambiak lah barang yang dibaok angku ko, dek angku ndak tarimo nyo lawan lah jo angku, padahal urang manyamun ko rami bana. Biasonyo urang dulu banyak yang bailmu baitupun jo angku Mandu Gudang, nyo punyo ilmu lo, jadi urang yang manyamun pakai golok panjang ndak nyo hiraukan, bacakak lah angku malawan urang rami tu. Lah lamo bacakak tatangkok lah angku jadinyo, karano angku ko malawan taruih sakik lah ati panyamun dek nyo. Di dabiah lah angku, sampai kapalo angku putuih, kapalo jo badan angku dipisah dari duo sisi bukik yang tapisah. Badan angku dicampak an di barat kapalonyo di timur.
Di Solok, tapeknyo di rumah bini angku Mandu Gudang, sahari sesudah kejadian angku tabunuah. Tibo lah urang menyampaik an ka keluarga angku kalau angku lah mati tabunuah, sampai lah carito angku ka sanak yang lain. Dicari lah maik angku ko, kironyo ndak basuo, diputuih an lah untuak ndak usah mancari, tapi langsuang se mandoa lai. Saminggu labiah angku ndak basuo, mando'a lah urang rami di rumah bini angku, sadang mandoa tadanga bunyi urang mangatuak pintu. Di caliak lah dek urang sadonyo tamasuak bini angku, waktu pintu dibuka takajuik lah urang dibuek nyo, dek yang tibo iyolah angku mandu gudang tapi mode ndak ado tajadi api apo. Badan jo kapalo angku utuah ndak ado yang badarah, dek urang lah heran. Nyo jalehan lah kejadian sabananyo dek angku "aden iyo dibunuah, tapi den cari kapalo den baliak" kecek angku. Mungkin dek angku ko bailmu jadi bisa se itu nyo karajoan, sesudah kejadian tu angku iduik kayak biasonyo, carito angku yang santiang ko lah tadanga dek urang. Sampai ka bayang lah tau urang sadolah nyo, jadi urang mangecek an angku tu yo bana santiang. Kayak bisa iduik duo kali, dek kejadian itu makin picayo lah urang bayang kalau wali nagarinyo iyo urang yang santiang jadi angku Mandu Gudang manjadi labiah di dihormati sarato makin disagani.