Pulang Ka Bako

Disalah satu desa nan talatak di Kab. 50 Kota. Hiduklah seorang anak gadih rancak nan banamo Laila, Laila adolah anak ka duo dari barampek bersaudara. Laila bisa dikatokan talahia dari kaluarga nan barado dan tapandang di kampuangnyo. Tapi samanjak ayahnyo maningga katiko inyo manginjak sekolah di janjang smp, sado harato Laila tu mulai habih baransua-ansua sampai ndak basiso. Dek karano mode itu, ibu Laila mamutuhuhan untuak manikah baliak. Tapi parnikahan itu indak juo batahan lamo, dikaranokan laki kaduo dari ibuk si Laila ko maningga dikaranokan kecelakaan. Semenjak itu lah ibuk si Laila ko mamiliah untuak majando dan fokus kapado anak-anaknyo jo karajo sabagai tukang jaik.

Laila kini barusia lah 24 tahun, Laila alah salasai manyalasaian pendidikannyo di salah satu perguruan tinggi negeri yang barado di Kota Padang, dengan jurusan nan nyo ambiak adolah pandidikan guru. Kini seharian Laila di rumah hanyolah manolong ibunyo dek karano alun dapek karajo.

Pado suatu hari datang lah urang nan batamu ka rumah Laila, tamu itu adolah induak bako dari si Laila, yang banamo ibuk Dias.

Assalamualaikum.., 

“ado tamu tu laila?, co kau caliak ka mungko bia amak nan manyalasian ko” kato amak jando baranak ampek yang banamo minah. 

“iyo mak, laila caliak ka mungko lu mak”. 

Walaikumsalam.., si laila anak mak minah yang ka duo mambukak pintu dan heran mancaliak tamu tu, sabab ndak nyo kenal. 

“ado amak nak?”, tanyo amak yang datang baduo samo lelaki bujang

“iyo lai mak, amak nyo sadang kadapua, masuak lah amak lu bia laila panggia dulu.” Kecek si laila

Laila pun pai ka dapua untuak maimbau amak nyo

“mak lah siap mak karajo?”tanya laila

“iyo lah tajarangan tingga tunggu se lai nyo, sia nan tibo tu laila?”. 

“ndak tau laila do mak, ndak urang siko nyo do, tapi ba raso-raso parnah nampak dek laila yo mak, amak caliak lah ka mungko mak, bia lah laila nan mancaliak ko” 

mak minah pai mancaliak urang nan tibo tu. 

“ondeh mandeh minah.., samakin hari kau makin rancak jo nampak dek den, patuik lah adiak den katuju bana jo kau dulu yoo” kecek tamu nan tibo tu sacaro langsuang

“ondeh aii.., kak Dias nan tibo kironyo, pandai bana akak mangecek kini yo, malu lo aden di kecekan kayak itu nyo, lah duo cucu den kak “. Mak Minah langsuang basalam jo bapalukan samo kak Dias. 

“ba nyo kak?, lai sehat-sehat se akak?, bilo kak pulang?, bara hari lo akak di rumah ko? Samo sia jo kak pulang?”tanyo mak Minah

“yo banyak pertanyaan kau yo minah, lah samo jak ditanyo polisi lo den ha”. Kato kak Dias jo candaan nyo.

 “ aden tibo di rumah patang sanjo jo kapa tabang, den pulang batigo se samo apak paja ko ha, manunjuak anak bujang nan dari tadi nyo diam se mandangga amak-amak bagarah. “ aden dirumah lai lamo Minah, sabulan apak paja kok dapek cuti. kok mananyo sehat ndak sehat nyo den, alhamdulilah badan den mode iko-iko sajo, lai lah tajuah den dari panyakik nan parah-parah, tapii, kok saku den iyo lah agak sakik kini ha dek biaya pulang patang ko ha”. Kato mak Dias jo candaannyo. 

“yo pandai bana akak den mangecek kini yoo, oii kak, awak marantau tu tuak mancari rasaki mamparbaiki ekonomi, mangecek akak saku nan sakik dek ongkos pulang, eh hei kok satiok bulan kak pulang ndak ba kak mangecek mode itu do, iko pulang yobana sakali saabad, sampai-sampai anak den si laila tu ndak tau jo akak lai” kecek mak Minah. 

Lamak lah galak mak Minah jo Kak Dias ko.

“ondehh sakik paruik den dek galak Minah, jadi kau ba nyo jo sia se kau dirumah ko?, a se karajo kau kini?, ma anak-anak kau nyo?” tanyo kak Dias

“mangecekan den mananyo mode polisi, kiro eh akak samo ehh nyo” sambia galak-galak. “aden kini tingga ba 3 se samo anak-anak den nyo kak, si Laila, arip, nan si bungsu ana, nan paliang gadang si edi nyo lah babini baranak lo kini, tu nyo sibuk lo jo keluarganyo, kadang adiak-adiak den tu nyo lai acok main ka siko. Den sibuk manjaik se kini nyo, lai  banyak urang nan acok datang mancari den tuak dijaikan baju. kalau masalah urusan rumah, anak den lah gadang-gadang lah abih mandiri dolah eh, si laila tu nyo alah siap kuliahnyo tingga manunggu jadwal wisuda lo lai nyo, si arip tu nyo sadang kuliah lo kini dan si ana nyo lah kelas 3 sma lo kini, sabanta lai nyo ka kuliah lo kecek nyo lai. Ba a dek akak tu ha piti kalua ajo nyo haa”. 

“jan mangecek mode itu juo kau Minah rasaki anak tu lah sudah sabanta lai kau nan sanang lai tu mah”. “iyo itu kak, iko nyo anak akak tu?” tanyo mak Minah manunjuak anak bujang dan dari tadi aniang-aniang se. 

“iyo si Toni, nan limo taun di ateh si Laila, nyo alhamdulilah patang ko lai lolos masuak karajo di perusahaan dan ado di jakarta Minah”. 

“ooo iyo alhamdulilah lah tu”. Mak Minah senyum ka Toni baitupun Toni. 

“oo iyo lah maota kariang se awak mah kak, tunggu lu kak den katangahan lah nasi dulu yo kak, makan wak disiko”.

Mak lailapun pai kabalakang untuak maimbau si Laila

“oo laila, ehh ado si ana lo, lah siap baraja na?” tanyo mak Minah

“iyo lah siap ana baraja mak” jawek ana, anak bungsu mak Minah

“lah siap karajo kalian ko?” tanyo amak. 

“alah salasai mak” kato si Laila. 

“haa pas bana tu, katangahan lah nasi ko ka mungko lai laila, ana!” suruah mak Minah 

“sia nan tibo tu mak?” tanyo laila. 

“induak bako kalian, etek Dias jo anak tunggalnyo si Toni” 

“oo patuik lah raso-raso pernah nampak dek laila mak” 

“kakaknyo alm apak mak?” tanyo ana 

“iyo ana, kini wak katangahan nasi ko dulu lah, beko disitu wak maota-ota” 

“adih mak” jawek laila dan ana.

Maota lah kaluarga tu samo-samo, tapi si Toni ko nyo mancuri-curi pandang se ka si Laila salamo makan, dan si laila tu manyadarinyo pulo, yang mambuek nyo jadi malu-malu kuciang. Salasai makan si ana samo laila mambarasihan tampek makan tadi, mambaok piriang-piriang kumuah tu kabalakang, tu si ana nyo mancuci piriang tu, dan si laila baliak ka mungko. Alah lamo maota, dek mangana hari lah sanjo , pulang lah mak Dias samo si Toni.

Bisuak harinyo, si Laila mandapek kiriman surek dari Toni anak mak Dias, di dalam surek tu Toni mamuji  kecantikan laila dan sanang bisa sobok samo si laila, bahwasayo inyo terkesima jo kecantikan si Laila. Laila nan mambaco surek tu dibueknyo malu-malu kuciang yobana taraso tabang-tabang hati si laila dibueknyo wakatu tu. Dan si laila pun mambaleh surek dari Toni dan mangecekan tarimo kasih karano lah mamujinyo.

Sasudah tu, bisuaknyo tibo-tibo si Toni datang ka rumah mambaok bungkuhan 

“Asslamualaikum”, 

“waalaikumsalam” 

mak minah nan baru salasai sholat langsuang mambukakan pintu, tu Toni pun langsuang basalam samo mak minah. 

“ehh Toni kironyo amak sangko sia, ado a tu Ton?”, 

“iko mak haa, amak manyuruah maagihan iko ka amak ha”, sambia manyarahan sabuah bungkuhan. “ondeh a ko Toni?” 

“itu mak oleh-oleh dari Jakarta, patang amak lupo mambaonyo” 

“mokasi banyak ha toni, masuak lah Toni lu, duduak sambia minum lah lu”, 

“laila oo laila” amak maimbau laila

“yo mak” laila pun datang ka mungko. 

“iko ha ado Toni datang mambaok oleh-oleh dari Jakarta, kau buekan lah minum laila, tu baok ko ka balakang sakali” maagihan bungkuhan tu ka si laila 

“jadih mak” ucap laila. 

Pas mambuek minum si laila lah galak-galak surang, sanang hatinyo Toni datang ka rumah, lah siap mambuek minum si lailapun baliak ka mungko. 

“minum lah aia ko dulu ha Toni, tu ko ado kue-kue sekatek makan lah Toni, amak ka manjaik dulu ha, banyak baju urang nan kadijaik” 

“iyo jadih mokasi mak” ucap Toni”. 

“laila maota lah samo Toni, tanyo-tanyo masalah karajo” kecek amak ka si Laila

“iyo jadih mak” jawek laila

Diruang tamu tu tingga si Toni samo si Laila baduo, kamudian Toni pun mamulai mangecek

“ba kaba Laila, lai sehat?”

“alhamdulilah lai da, uda ba nyo?”

“samo uda pun baitu pulo”

laila pun hanyo tasanyum jo jawaban Toni tu

“ba kok senyum laila, senyum laila tu rancak bana” gombal Toni

“hehe, uda bisa ajo” laila tersipu malu

“laila rencananyo sudah wisuda ko kamanga?”

“rencana laila nio mancubo masukan lamaran kasikolah-sikolah da, karano jurusan laila patang ko pendidikan guru”

“ooo rancak tu laila, co marantau laila di kota-kota gadang tu labiah banyak paluang, itu saran uda ka laila”

“kalau marantau masih jauah pangana laila da, pastikan amak payah malapeh laila pai surang, apo lai laila anak padusi”

“iyo laila, paham uda mukasuik lailanyo, mungkin amak pasti mangizinan laila kalau lah balaki kan”

Laila spontan takajuik samo kato-kato Toni nan mode itu tu, laila hanyo diam mandangga kato-kato Toni tu.

“ooo iyo laila, kayaknyo uda langsuang pulang se lah kini lu laila, beko amak cameh lo, takuik lo beko uda tasasek kan, dek ndak tau jalan” toni sambia sanyum- sanyum

“haha, iyo jadih da kalau uda nio pulang lai” 

“kecekan ka amak yo laila, bahaso uda ka pulang dulu, ohh iyo lamak aie buekkan laila, mokasi yo laila”.

“hehe, iyo da samo-samo”

Malapeh kapaian si Toni, lailapun langsuang masuak kamar dan galak-galak surang, nyo yobana maraso sanang bana wakatu.

Bisuak harinyo Toni ko katagihan basobok jo si laila, sampai-sampai  acok pai ka rumah laila dan maota-ota baduo samo. dan sakali Toni ko mamintak izin samo mak Minah untuak mambaok Laila kaliliang-kaliliang kampuang, mangawanan Toni tuak mancaliak-caliak kampuang, dan mak Minah pun hanyo bisa maiyoaan karano manuruik mak Minah, Laila lai pai samo urang nan nyo kenal yaitu anak dari kakak alm lakinyo.

Suatu hari, datang lah adiak mak Minah sakalian mamak dek si Laila yang banamo mamak rifman

“oo kak” rifman langsuang naiak ka ateh rumah dan maimbau-imbau kakaknyo mak Minah

“oikk ang rif, ado a?” 

“aden ado nan ka den tanyoan samo akak ciek” 

“a deh?”

“ma si Lailanyo?” tanyo mak rif mulai muak

“manga mananyo si laila wa ang?, si Laila nyo pai ka pasa den suruah tuak bali bahan samba”

“samo sia nyo pai kak?”

“tadi nyo dari rumah surang se nyo”

“BADUTOO!!”

“dek a wa ang naik darah se, takajuik den rif” sambil maelus dadonyo

“tadi aden nampak si laila bangoncenggan samo laki-laki, sia tu?, lewat se nyo ndak nampak den dek nyo do, MAMAKNYO SURANG!, subana lah angek talingo den mandangaan iko kak, si laila tu jadi bahan bangunjiang dek urang-urang lapau, dakek den bana urang-urang tu mangecek, patamo aden ndak picayo, ndak kamungkin lah kamanakan den nan rancak jo cadiak tu ka mode itu do, TAPII BA A?, TADI ADEN NAMPAK JO MATO KAPALO DEN SURANG!, RUNTUAH PICAYO DEN KA SI LAILA KAK”.

“samo sia nyo bangoncenggan tu?” mak Minah mulai panik

“ma tau aden kak, akak amak nyo mah, labiah tau lah akak lai nyo urang-urang nan acok datang ka rumah ko”

“setau den nan acok datang akhir-akhir ko si Toni anaknyo kak Dias kakak alm apaknyo, nyo pulang kampuang tu batamu kamari, tu nyo acok lo main-main kamari mananyo-nanyo ka si laila tantang ba se kampuang ko kini, tampek nan rancak di siko. Tu nyo parnah lo maajak si laila ko tuak mangawani nyo mancaliak-caliak kampuang. Ndak bisa den larang do rif, manuruik den a lo salah eh nyo dakek samo bako nyo surang”.

“OOO SALAH GADANG AKAK!, si Laila samo si Toni ko patamo, inyo ndak sasuku yang barartinyo ndak saudara, sah sah se nyo baginyo baduo tuak manikah. kaduo, si Toni ko lah lamo ndak pulang, baru patamo mancaliak si laila ndak mungkin bisa nyo meanggap si laila ko adiak nyo, apolainyo dalam maso-maso umua dima nyo sadang suko-suko eh mancaliak padusi. nan katigo, pasti ado hubungan anak urang baduo ko”.

“A MUKASUIK WA ANG RIF?, ang mancacek den ndak bisa marawat anak ba itu?, walaupun den lah lamo manjando eh rif den nan manggadangan anak den nan barampek tu surang sampai-sampai nyo bisa sikola satinggi tu”

“indak usah akak nan emosi di siko den nan saharusnyo emosi disiko, den ndak sanang mandangga kecek urang kampuang ka si laila nan mode itu tu lai, labiah rancak akak nan mananyo ka si laila ba nan subananyo, kok indak bia lah den mangecek, den tunggu si laila tu disiko”.

Mak Minah kahabisan kato-kato dan inyo hanyo diam sajo, ndak lamo sudah itu datang si Laila mambaok banyak bungkuhan balanjonyo

“assalamualaikum, ehh ado mamak kironyo, lah makan mak? Laila baru sajo baru baliak dari pasa mambali bahan samba”.

“duduak kau laila amak nio mangecek jo kau”

laila pun langsuang duduak, mak Minah hanyo diam di tampek duduaknyo.

“samo sia kau pai pasa?” tanyo mamak

“surang se nyo mak” jawek laila

“PANDAI KAU BADUTO KINI!”

laila langsuang takajuik maliek mungko jo caro mangecek mamak nyo nan lah mangareh

“ndak ngarati laila mukasuik mamak do” caro mangecek Laila lah panik sambia manunduakan kapalo

“huft,” mamak rifman manariak napeh patando nyo nio manahan emosi

“tadi aden nampak kau bagoncengan samo laki-laki sia tu?, ndak nampak dek kau den tadi do?” sambuang mamak rif

“maaf Laila mak, ndak ado nampak dek Laila tadi mamak do, tadi itu uda Toni anaknyo Tek Dias mak. Tadi Laila ndak sangajo basarobok samo inyo, tu inyo maajak laila pai kaliliang kampuang sabanta mak” caro mangecek laila lah mulai takuik, raso-raso manangih.

“LAMAK SE DEK KAU YO LAILA, KAU PADUSI DI AJAK DEK LAKI-LAKI NAN INDAK MUHRIM KAU NAMUAH SE KAU PAII.. DIMA LATAK HARAGO DIRI KAU LAILA..” mamak rifman lah mulai emosi bana

mandanga kato-kato itu, kalua lah aia mato si laila, ndak talok nyo Manahan supayo indak manangih lai.

“manga kau manangih?, ndak ado guno kau manangih siko do, lai kau harogoi juo den sabagai mamak kau baru Laila?”

“lai mak” suaro Laila bacampua jo isakan tangihnyo

“INDAK MANAGIH ADEN SURUAH DO LAILAA”

“RIFMAN, ALAH ANG MANGECEK TU” sanggah mak Minah nan alah ndak tahan mandanga kato-kato kasa dari si Rifman.

“manga akak lo nan mangareh ka den?, anak akak ko nan patuik diajaan. AHHH ALAH MAH!!, akak urus lah anak akak tu lai, sakik kapalo den” mamak Rifman langsuang pai tanpo mangecekan salam

Laila masih taruih manangih taisak-isak dan inyo pun langsung balari ka dalam biliaknyo, dituruiknyo dek mak Minah

“Laila lai jaleh dek kau, kato-kato mamak kau tadi tu?”

laila masih anyo diam

“jawak amak Laila” sambuang mak Minah

“lai mak” jawek Laila

“iyo ado hubungan kau baduo samo si Toni tu?”

Laila aniang mandanga kato-kato amaknyo tu

“kok iyo ado na ndak ado gai salah eh do lailah” sambuang amak

“kalian tu ndak ado hubungan apo apo do, kalian tu ndak sasuku sah sah se bagi kalian untuak manikahnyo, ciek lai umua kau lah pas lo untuak manikah nyo laila. ITU NAN DINAMOAN MANIKAH PULANG KA BAKO TU, lai mangarati kau tu Laila?, kini jawek lah amak lai, ba kau samo inyo?”.

“subana eh iyo mak samanjak uda Toni datang kamari laila lah sanang lo mancaliaknyo, baitupun uda Toni ka Laila mak, ndak ado mukasuik Laila nio mambuek namo kaluarga buruak dek parangai laila do mak, maaf Laila mak” tangih laila mulai manjadi-jadi

“iyo iyo alah tu Laila” amak mulai mananangan si laila

Di wakatu nan samo di tampek nan babeda, yaitu di rumahnyo si Toni

“Toni, baliak ma wa ang?” tanyo Tek Dias

“baliak puta-puta kampuang mak, samo si laila” si toni sanyum-sanyum 

“Toni, ndak bisa wa ang baok parangai kota ang di siko do ton, iko minangkabau nagari nan baradat”

“mukasuik amak?”

“amak lah acok mandanga iko dari urang-urang bahaso wa ang acok bagoncengan baduo samo si laila, ndak bisa prinsip iko ko nan wa ang pakai siko do ton, si laila tu padusi inyo nan ka kanai pandangan buruak dek urang kampuang”

Toni hanyo aniang mandanga kato-kato amaknyo

“katuju wa ang samo si laila?” lanjuik tek Dias

“kalau Toni buliah jujur iyo mak, lain se nampak dek Toni laila tu, beda se inyo dari padusi-padusi lain yang pernah toni caliak”.

“haaa, kalau nan itu nan katuju dek wa ang, manikah lah wa ang samo inyo, manuruik amak laila tu elok lo parangainyo, daripado ang baok-baok se si laila mode itu, tambah buruak se namo si laila tu”.

“iyo mak, kalau lah satuju lo amak, datang lah awak karumahnyo lai mak”

tek Dias pun hanyo tasanyum sanang mancaliak anaknyo.

Bisuaknyo diadoaan lah patamuan duo kaluarga, yaitu kaluarga si Toni samo si Laila, tapeknyo di rumah si Laila. bakumpua lah mamak-mamak si Toni dan si Laila di situ untuak mancari kato mufakat basamo-samo tantang parnikahan si toni samo si laila ko. Akhirnyo satalah parbincangan lamo mako tasobok lah kato mufakat tu, bilo parnikahan tu adoaan, dima tampek parnikahan tu. Dan akhirnyo si Laila sah manjadi istri Toni. Dan si Laila manikah samo bakonyo surang.

SELESAI..

Payakumbuh, Maret 2020

Biodata penulis:

Nabila Mayesa, lahir 09 mei 2000. Sedang menempuh pendidikan di Universita Andalas, Jurusan Sastra Minangkabau, Fakultas Ilmu Budaya.