“Rantau jo Cinto Nan Arek”

 

Oleh: Rana Aulia Citra

Sinopsis

Carpen ko mancaritaan tantang saurang urang padusi nan banamo Gadih Manih nan satia manunggu laki nyo pulang.  Barawal dari Gadih Manih nan dijodohan jo Bujang Ameh.  Bujang Ameh tu saurang urang laki-laki mudo nan gagah di kampuang nyo.  Parilakunyo nan elok, rajin mangaji.  Panikahan nan awalnyo di tantang dek kaduo balah pihak mampelai dikarenaan kaduonyo indak tau bahwo urang tu panah ciek sakolah samaso dulu.  Sasudah di agiah tau, kadunyo satuju untuak manikah jo saliang mancintai.  Indak lamo sasudah urang-urang tu manikah, Bujang Ameh mamintak izin ka bini nyo untuak pai marantau ka madan dali.  Disitu lah Bujang Ameh bakarjo di toko urang manjua roti.  Karano Bujang Ameh kurang pueh jo pakerjaanyo, inyo pun pai ka banjarmasin.  Di banjarmasin nyo Bujang Ameh mandapekan banyak piti, jo inyo alah baniaik untuak pulang ka kampuang halaman manjapuik bini, mandeh jo adiaknyo.

 

di sisi lain, Gadih Manih di datangi dek surang laki-laki paliang kayo di kampuang banamo Bujang Sarakah. Sutan mandatangi Gadih Manih jo mamburuak-buruakan Bujang Ameh. Baharap Gadih bapaliang ka nyo.  Karano Gadih urang nan setia, inyo indak mahiraukan kecek Bujang.  Balain jo amak Gadih nan tagoda jo kecek si Bujang ko.  Salang babarapo hari sutan ka rumag, pulang juo Bujang Ameh ka rumah nyo mamakai baju compang campiang,muko lusuah.  Mancaliak lakinyo nan bantuak tu, Gadig mambaok lakinyo ka pasa untuak mambali baju baru.  Gadih indak tega mancaliak lakinyo mode ko.  Di patengahan pajalanan di pakan, Bujang Ameh mamintak izin pai ka wc nan ado di sinan. Baliak-baliak Siti kalasun takajuik mancaliak Bujang Ameh nan awalnyo lusuah tiba-tibɔ barubah manjadi laki-laki nan gagah. Kironyo itu siasat Bujang Ameh untuak mauji bininyo yo bana setia apo indak. singkek carito Bujang Ameh jo bininyo pulang ka rumah bakumpua jo kaluarga nyo.

Caritoko barawal dari Amai One nan tibo ka rumah Amai Bayan untuak ka maambiak Bujang Ameh ka di jadian manantunyo. Pas Amai Bayan sadang manjamua padi Amai One ko tibo tu langsuang bakato, “assalamu’alaikum, sadang manga uni tu” kato Amai One babaso basi.

“iko ha, sadang manjamua padi,  ado apo tu ni? Marilah masuak duduak dulu”. Amai One jo Amai Bayan pun duduak barundiang tantang lamaran ko.

“jadi giko ha ni, nampak di awak si Bujang Ameh ko rancak laku, rajin ka surau, rajin ka sawah. Jadi mukasuik awak ka siko untuak manjadikan Bujang Ameh ka jadi laki si Gadih Manih”.

Amai Bayan pun takajuik, nyo mambaleh “tapi uni, umua si Bujang ko talampau mudo untuak di pabinian”. Amai One pun mayakinan “iyolah, cubo uni pikian jo rundiangan dulu. Limo hari lai awak baliak ka siko”

“jadinah ni, beko wak rundiangan” Amai Bayan pun malanjuikan manjamua kain, Amai One pulang ka rumahnyo.

Dalam limo hari tu Gadih Manih jo Bujang Ameh tau jo pajodohanko, mulo-mulonyo manolak tapi dek kadunyo tau jo parnah basobok akhirnyo baduo tu maiyoan pajodohanko.

Singkek carito Gadih Manih jo Bujang Ameh manikah. Mulo-mulo harinyo bajalan lancar sampai tibo Bujang Ameh maraso karajo jo hiduiknyo tu indak barubah-ubah. Di siang hari, katiko Gadih Manih sadang bajalan-jalan jo Bujang Ameh. Mangeceklah Bujang Ameh untuak izin marantau “di caliak-caliak hiduik awak indak barubah-ubah. Udah alah bapikia untuak pai marantau. Mukasuik untuak marubah nasib awak di kampuang, baa pandapek adiak tu”.  

Gadih Manih langsuang  takajuik “yo bana uda ka pai marantau? Tu baa Gadih di siko? Ka uda tinggan Gadih salamonyo di kampuang ko?

Bujang pun manjawek jo kalembutan “indak mode tu do diak, uda bajanji ka adiak, jikok uda lah maraso cukuik uda pasti langsuang pulang manjapuik adiak”

Gadih mambaleh “lai sabana uda mode tu, jikok itu kecek uda, gadih lapehan uda pai. Beko malam gadih siapan kaparaluan uda pai. Nan utamo bana uda izin lah ka urang tuo awak dulu.

Bisuak paginyo Bujang Ameh mamintak izin sakalian barangkek ka pakanbaru. Di haritu Bujang pai di iriangan jo ratok tangih kasadonyo.

Pailah Bujang ka pakanbaru manampuah pajalanan 8 jam labiah dari kampuangnyo. Sasampai di pakanbaru tantu Bujang langsuang mancari karajo. Dapeklah nyo karajo manjadi tukang manjua ikan di pasa. Ciek satangah tahun di jalaninyo, bujang pun bapikia jikok iko se karajonyo baa nyo ka capek pulang untuak manjapuik si Gadih manih bini nyo tu.

Tibolah pas malam hari, tapikia di nyo untuak bapindah tampek marantau ka batam. Nyo maraso indak ado salah nyo cubo pai ka batam mancari pitih nan labiah untuak capek pulang ka rumah.

Di cubolah nyo ka terminal mancari oto ka batam, ba hari-hari di tampuahnyo pajalanan ka batam. Di cubo kian kamari mancari karajo alun jo dapek. Sampailah sa katiko Bujang Ameh dapek karajo di kantua P.T tanamo. Samakin lamo bujang naiak jabatan. Alah maraso sangaik cukuik bujang lah sangaik taragak bana jo bininyo. 

Di sisi lain, Gadih manunggu-nunggu kadatangan Bujang Ameh nan indak ado kaba. Sadang manunggu-nunggu tibolah Bujang Sarakah maangek-angekan Gadih Manih. 

Bujang Sarakah bakato “oi Gadih Manih, manga mamanuang juo. Manga manunggu-nunggu laki kau nan indak kunjuang tibo tu. Ancak jo den lai, den urang kayo tanamo di kampuang ko,laki kau pasti alah banini baru di sinan, lah iyo kau jo den di siko”.

Gadih Manih pun manjawek indak picayo “apo pun nan ang kecekan den indak picayo, inyo laki den lah pasti den tau baa sipaiknyo” 

Gadih Manih tatap tagok pandirian sangaik-sangaik cinto jo lakinyo. Tapi balain jo Amai One capek bana picayo jo kecek-kecek Bujang Sarakah.

Salang babarapo hari, Bujang Ameh pun pulang tapi makai baju compang campiang. Takajuik Gadih mancaliak lakinyo nan patamo siaik-siaik pulang-pulang baju compang campiang muko lusuah.

Manangih Gadih mancaliak lakinyo pulang modetu. Sasudah istirahaik, Gadih pun maajak Bujang ka pasa untuak mancaliak mambali baju untuak lakinyo. Di tangah pajalanan bujang pai izin untuak ka bali sasuatu. Babarapo minik Gaadih manunggu, Gadih takajuik mancaliak lakinyo nan alah barubah bana. Nan mulonyo lusuah manjadi Gagah,sihaik,rapi yo bana bantuak bos nan kayo. Di sinan batanyo-tanyolah Gadih apo nan sabananyo tajadi. Bujang Ameh pun manjalehan apo nan sabana tajadi, Bujang sangajo pulang lusuah untuak mauji bininyo yo bana satia apo indak. 

Satalah itu kaduonyo pulang ka rumah manjalin hiduik nan labiah arek.

TAMAIK..!

Penulis saat ini berdomisili di Cupak Tangah,Padang. Mahasiswi angkatan 2022 Jurusan Sastra Minangkabau, Fakultas Ilmu Budaya, Universitas Andalas.