RANDANG BADA

Oleh: Mardika Partiwi mahasiswa sastra Minangkabau universitas Andalas

Mandanga urang manyabuik randang, pasti nan tabayang dek kito adolah Randang Dagiang. Kironyo ado pulo Randang Bada. Jikok didanga dari namonyo tantu kito tau kalau bahan utamo dari masakan iko adolah bada. Randang ko ado didaerah Kabupaten Solok, Randang Bada ko dapek kito tamui pado acara-acara adat sarupo baralek, mandoa jo acara lainnyo. Randang Bada manjadi samba nan harus ado dalam sabuah acara, apolai acara baralek  indak afdhol rasonyo jikok dalam sabuah acara baralek samba Randang Bada ko indak ado. 

Karano disatiok daerah tu nan bada ko pasti bamacam-macam bantuaknyo. Jadi kito deskripsikan bada yang dipakai untuak mambuek Randang Bada, kalau didaerah Kabupaten Solok bada nan dipakai untuak Randang Bada  adolah bada aia tawa nan indak bagaram jo alah dijamua sampai kariang. Bada ko nyo sarupo bada teri tapi agak gadang ukurannyo kiro-kiro 5 cm. Warnanyo pun agak galok dari pado bada teri.

Caro mambuek Randang Bada ko babeda jo caro mambuek Randang Dagiang pado umumnyo. Sabalum kito masuak ka proses mambueknyo tantu kito sadiokan dahulu bahan-bahannyo. Bahan-bahannyo adolah bada kariang aia tawa satungkuih , karambia ciek, lado sacukuiknyo (kok suko padeh agak banyak lado stek), bawang merah jo bawang putiah (agak banyak sajo bawang nyo supayo taraso), garam kasa sacukuiknyo, penyedap sacukuiknyo, daun kunyik, daun salam jo daun limau puruik sagalo saketek, minyak manih.

Sasudah kito sadiokan bahan-bahannyo masuak ka caro jo proses mambueknyo. Nan paralu bana kito parhatikan dalam mambuek Randang Bada ko, katiko bada ka dicampuan jo ladonyo pastian bada jo ladonyo alah dingin. Tujuannyo supayo bada indak layua atau lambok. 

Caro mambuek Randang Bada nan partamo karambia kito kukua. Siap tu randang/sangrai karambia tu sampai bawarna coklat, giliang karambia tu sampai mangaluaan minyak nyo. Lanjuik angkekan kapalo bada kariang, jan dicuci bada tu langsuang randang/sangrai sampai nyo saparo masak, sudah tu baru digoreng. Manggoreng bada tu salayang sajo karano nyo alah masak juo pas di randang/sangrai tadi.

Nan kaduo masuak ka caro mambuek ladonyo. Giliang lado nan alah diangkekan tampuak nyo sampai aluih giliang nyo, jan lupo agiah garam kasa sasuai salero. Sudah tu Irih aluih bawang merah jo bawang putiah, baru digoreng sampai warnanyo manguniang. Masuakan lado giliang jo daun-daun nan alah  disadiokan tadi, jan lupo agiah penyedap saketek penyedap ko bisa masako, roiko atau nan lain. Baru kito  masuakan pulo randang/sangrai karambia nan alah digiliang, goreng sampai sabana-bana masak. Jikok diraso alah masak sadonyo dinginan dulu ladonyo. Kalau bada jo ladonyo alah samparono dingin baru bisa kito campuan jo kito aduak rato. Randang Bada alah siap untuak disajikan, kiro-kiro rasonyo lamak padeh, asin agak manih-manih stek. Ha jikok panasaran pulo dek nyo silahkan dibuek sajo langsuang.