Ticker

6/recent/ticker-posts

Perlunya Menanamkan Kembali Adat ‘Raso jo Pareso’ Kepada Generasi Muda Zaman Sekarang ”



Oleh Dedi Setiawan

Mahasiswa Jurusan Sastra Minangkabau,

Fakultas Ilmu Budaya, Universitas Andalas



“Adat basandi kapado alua

 Alua basandi kapado patuik jo mungkin

Raso dibaok naiak, pareso dibaok turun

Adat basandi Syarak, Syarak basandi Kibullah.” 

Intisari dari adaik Minangkabau adolah “Raso jo Pareso” sasuai jo kato adaik nan diateh. Mukasuiknyo adolah raso takuik takuik kapado Allah, raso malu sarato sopan kapado sasamo manusia, sagan manyagani, tenggang raso jo saliang mangaharagoi diantaro sasamo kalompok masayarakaik. Raso sopan muncul dek akibaik raso malu, mako dari tu RASO kolah nan manjadi paarek jo paikek arek antaro sasamo masyarakaik dalam bakahiduikan basosial.

Jikok kito liek pado zaman kini, iyolah sabana mulai hilang nan raso jo pareso dek masyarakaik Minangkabau nan umumnyo dek kaum mudo-mudo. Tingkah laku jo caro mangecek kaum nan mudo-mudo kini sangaiklah babeda dari nan saharusnyo, apo sabab?  Karano lah nyo makan sadolah pangaruh-pangaruh dari lua yang di sababkan dek kamajuan teknologi nan sarupo kini ko. Caro hiduik urang-urang nan indak baradaik lah nan ditiru-tiru dek pemuda-pemuda zaman kini. Disikolah latak ketimpangan pado zaman kini yang mano indak bapikia-pikia panjang sabalun batindak,  lah samo sarupo koncek nan jikok takana lansuang malompek tapi indak tau tujuan. 

 Pamasalahan nan sarupo itu, indak lah sapanuhnyo dating dari kamajuan teknologi, karano dek kamajuan teknologi lah nan ma agiah informasi banyak tantang sagalo hal kapado generasi mudo. Hanyo sajo indak tasariang sadolah pangaruh-pangaruh tasabuik dek generasi mudo, dan disikolah harus sangaiklah manonjol peranan urang tuo sarto mamak untuak mandidik anak jo kamanakan supayo indak tapangaruh dek kamajuan zaman. Tugas nan saharuihnyo dilakuan dek kaum urang tuo adolah mambimbiang inyo nan mudo-mudo ka nan elok, tau jo adaik jo agamo, sarato malatiah kapado kapandaian, kesenian, adaik jo budaya. Nan paliang khususnyo adolah malatiah kaum mudo kapado jiwa kepemimpinan supayo inyo tau ba a bana nan mangharagoi, sarato manyagani, dan mamimpin indak sajo sakahandak hati, sarupo kato papatah “barajo dihati basutan di mato” nan artinyo adolah jan babuek hati nan bakahandak surang, egois, dan indak mamikian urang lain. Akan tatapi nan saharusnyo adolah sasuai jo falsafah adat Minangkabau “Lamak dek awak katuju dek urang, babuek baik kiro-kiroi, babuek jaek sakali kali jan”, nan mukasuiknyo adolah tingkah laku jo parangai nan banyak disukoi urang, babuek elok indak buliah balabihan jo jan pernah babuek kajahatan,  sarato tingkah laku jo parangai haruslah sasuai jo norma dan hokum nan alah digariskan dan ditantuan dek adaik jo agamo.

Baitu sangaiklah baharago nan raso jo pareso ko dek adaik Minangkabau, nan mano saluruah masyarakaiknyo disuruah untuak mananamkan raso malu jo raso sopan. Raso takuik kapado Allah SWT, raso malu kapado sasamo manusia, malu babuek sumbang salah, malu malangga aturan adat, malu babuek nan indak sopan, dan sabagainyo. bagi inyo nan indak mamakai raso jo pareso dan sopan santun disabuik urang nan indak tau di nan ampek, indak tau diataah takunyah, indak tau disuduik kancah.

Raso jo pareso dapek diparolah tarutamo dari didikan urang tuo dirumah tarutamo dari bundo kanduang. Karano pendidikan dirumah lah nan manjadi pondasi utamo anak untuak mananamkan sifaik raso jo pareso sabalun malangkah ka dunia pendidikan nan salanjuiknyo. Bundo kanduanglah nan manjadi limpapeh rumah gadang, acing-acang dalam nagari. Tampek maniru dan manauladan, kasuri tulandan kain, cupak tuladan batuang. Tampek pa aja baso jo basi pandindiang malu jo sopan. Mukasuiknyo adolah bundo kanduanglah yang harus gigiah dalam mandidik anaknyo supayo rajin sakolah jo mangaji supayo nantik manjadi anak nan tau samo raso jo pareso dan manjadi anak nan berakhlak dan beriman tangguah sasuai jo adaik jo agamo. 

Kaluak paku kacang balimbiang

Tampuruang lenggang lenggokan

Bao manari ka pakan baso

Nak sanang hati urang basamo

Anak dipangku kamanakan di bimbiang

Urang kampuang di patenggangkan

Tenggang nagari jan binaso 

Tenggang sarato jo adaiknyo.

Jadi manuruik hemaik penulis, sangaiklah paralu untuak diperatian masalah nan sarupo iko, karano nan mambimbiang jo mandidiak anak nan mamaciak peranan yang sangaik baharago adolah keluarga nyo surang, iyolah peran dari bundo kanduang nan paliang utamo dan haruslah diiringan jo peran mamak sabagai palangkoknyo. Sebab mamaklah nan akan mandidiak anak jikok lah manujo kapado usia ka matang. Mako daripado itu, sabagai urang tuo jo sabagai niniak mamak jan lah sampai lengah kapado keadaan nan serba modernisasi sarupo kamajuan teknologi dan zaman nan surupo kini, karano bisa manjadi sanjato nan mamatian dek anak jikok indak ado bimbiangan jo arahan dari urang tuo dan niniak mamak didalamnyo.


Nama Penulis : Dedi Setiawan

Status/Jabatan : Mahasiswa Sastra Daerah Minangkabau Universitas Andalas 

Alamat : Padang, Sumatra Barat

No. Hp/WA : 082172200504

Post a Comment

0 Comments


SELAMAT DATANG DI SEMOGA ANDA PUAS