Panjek Sosial

Oleh : Dea Agustin
Mahasiswa Jurusan Sastra Minangkabau
Universitas Andalas
Banang nan manjuntai dibakeh cabiak baju Iben goyang-goyang diambuih angin. Warna baju nan lusuah jo alah puda tatap dipakai Iben karano rato-rato sadolah baju yang dipunyoi Iben sarupo itu. Jo harapan dan sumangaik yang ado, Iben tetap mangaruak-ngaruak tiok-tiok tampek sarok ditapi jalan untuak mancari karah-karah jo boto plastik untuak dijua supayo bisa mandapekan pitih pambali makan untuak inyo jo anak bininyo.
Azan mugarik alah tadanga bakumandang, matoari baransua turun jo langik nan lah mulai kalam mambuek Iben baransua juo pulang ka rumah. Pitih nan dapek dari manjua karah-karah jo boto plastik nan sudah dikumpuaan alah barado disaku Iben. Jo sanang hati sampai dirumah maagiah pitih nan didapek walau indak sabara tapi masih bisa untuak pambali bareh ka bini nyo. Istri Iben taruih pandai dalam maatua pitih walaupun banyak saketeknyo dari Iben. Satiok ari kaluargo Iben taruih basukur ateh apo nan inyo punyo. Walau sakali-sakali pernah tapikia dek Iben baa iduiknyo sarupo-sarupo tu sajo, indak ado nan bisa dibanggaan hanyo cukuik pambali makan tiok ari indak dapek untuak pambali barang nan maha sakali-sakali.
Bisuak arinyo, Iben baliak mancari pitih ka tapi-tapi jalan sarupo biasonyo. Wakatu angek sadang taraso bana manyangek, walau alah mamakai topi, tapi angeknyo tatap mananbuihnyo hinggo angek juo taraso di kapalo Iben. Matoari nan tarang indak talampok saketekpun  barado satantang kapalo biaso disabuik urang wakatu makan siang. Tapi karanjang Iben alun sabara isinyo, sahinggo mambuek Iben tatap malanjuikan karajonyo. Iben mambalakangi jalan wakatu mangaruak-ngaruak tampek sarok, tibo-tibo ado oto nan mangklason-klason dari balakang mambuek Iben mancaliak ka oto tu. Kironyo urang kayo nan tingga disubalah rumah Iben. Karina turun dari otonyo jo tangan sabalah kiri mamacik hp untuak marekam tangan sabalah kanannyo nan mambaok kantong asoi barisi sarupo kotak nasi dari rumah makan nan bamerek diarahan ka Iben.
 iko dari awak untuak makan siangnyo pak kato Karina sambia maagiah asoi nan nyo pacik ka Iben.   tarimo kasih  kato Iben jo tampang heran Iben manarimo asoi nan diagiah Karina. Baa ndak ka heran, walaupun kayo biasonyo Karina jarang maagiah-agiah ka tetangganyo. Jan kan maagiah sasuatu, untuak saliang manyapopun Karina modenyo anggan. Karina emang dikenal dek urang kampuang urang kayo ongeh. Samanjak babarapo ari balakangan ko, Karina nampak acok babuek kabaikan jo mambagi-bagian makanan ka urang kampuang. Didalam pikiran Iben, Iben ndak namuah bapikia buruak ateh kalakuan Karina, mungkin sajo emang Karina alah dapek hidayah untuak manjadi urang labiah elok. Iben basyukur mandapekan razaki di tangah hari nan sadang mambutuhan makanan pulo
Sasudah maagiah makanan ka Iben, Karina langsuang naiak oto jo barangkek dari situ. Iben nan kebetulan lapa langsuang istirahat makan jo makanan  paragiahan dari Karina.
**
Dijalan ketek, biaso sarupo gadang jalan-jalan di komplek diujuang simpang tigo ketek ado rumah gadang bawarna putiah jo paga nan tinggi pakai basi warna hitam, di mukonyo banyak bungo-bungo warna-warni nan rancak sarato taman jo garasi nan luweh. Iben pulang ka rumahnyo taruih lewat di muko rumah Karina karano emang hanyo itu jalan manuju ka rumah Iben. Babarapo hari sasudah sobok jo Karina wakatu maagiahan nasi, Iben pulang dari karajo lewat muko rumah Karina. Nampak ado amak gaek nan alun gaek-gaek bana tapi jo muko nan maibo sarato badan nan lah nampak latiah mamintak-mintak di muko rumah Karina. Amak gaek tu mambunyi-bunyian paga Karina handak tadanga dek Karina.
 assalamualikum nak, ambo alun makan lai nak  amak gaek tu taruih maulang-ulang kato tu sambia mambunyian paga Karin. Mancaliak  amak tu disitu, Iben manuruik amak tu ka muko paga rumah karina.  Mak, ado apo amak disiko?  tanyo Iben ka amak tu.  ambo alun makan lai nak, ambo nio mamintak ka urang rumah rancak ko, kato urang kampuang inyo kini alah elok  jawek amak tu sambia taruih mambunyian paga Karina.  otonyo lai adoh mak, kayaknyo lai ado inyo di rumah mah mak. Tunggu lu dih mak, awak panggia  kareh-kareh dulu  sudah tu Iben maimbau-imbau jo suaro kareh supayo karina kalua.  Karina! Karina! Kalua lu  ariak Iben. Karina emang pai kama-kama pakai oto, dirumahnyo hanyo ado oto Karina karano inyo tingga surang dirumah dek lakinyo karajo di lua kota.
 Ndak barapo lamo, kalua lah Karina.  ado apo da?  karina sambia jalan kalua.  iko amak ko alun makan lai  kato Iben ka Karina.  ndeh daa, HP ambo di cas ndak adoh baterainyo doh da  kato Karina mangaluah.  tu apo lo hubungannyo amak ko lapa samo HP Karina?  tanyo Iben heran ka Karina.   tu iyo adoh nyo da, tu baa ambo marekamnyo? Jaleh satiok ambo maagiah-agiah urang taruih ambo rekam tu ambo masuakan ka sosial media lai  kato Karina sinis.  apo gununyo di rekam tu di masuakan ka sosial media bagai Karina?  tanyo Iben.  baguno lh nyo da, dek itu ambo terkenal mah. Urang-urang jadi suko samo ambo jo apo nan ambo masuakan ka sosial media tu  jawek Karina.  astaghfirullah Karina, jadi salomo ko Karina babuek kabiakan supayo di pandang urang di media sosial tu elok? Itu riya namonyo Karina, sasuatu nan indak buliah dikarajoan jadi kalakuan elok Karina salamo ko ndak ka di tarimo dek Allah SWT gai doh kalau niek Karina sarupo itu  tarang Iben ka Karina  eh uda, ndak usah udah manceramahi ambo lo gai. iduik kan iduik ambo jawek Karina kesal.
Mancaliak duo urang nan saliang ba sorak-sorak urang, nan lalu pun sarato tatanggo dakek rumah tu sato pulo mancaliak jo mandanga kecek si Iben jo Karina. Mandanga apo jawek jo alasan Karina salomo ko babuek kabaiakan, manyolo lah salah ciek urang nan mancaliak kajadian tu iolah pak bakar muazin musholla dakek rumah tu.
 astaghfirullah buk Karina, tobatlah buk sabalun talambek. Harato ko indak dibaok mati do buk. Ketenaran jo kakayoan ibuk di dunia nan ko indak ka ado gunonyo di akhiraik salain amalan nan ibuk pabuek di dunia ko nan ka manolong ibuk nyo. Sio-sio kalau ibuk babuek kabaiakan kalau riya nieknyo indak untuak Allah, indak ka jadi amalan dek ibuk do  tarang apak tu sambia dicaliakan urang banyak
 eh eh manga lo apak sato-sato lo? manga lo rami-rami mancaliak sadonyo gai ? pai lah sadolahnyo kanin lai, ndak usah gaduah-gaduah ambo lai  Karina masuak kadalam rumah tanpa mahirauan urang nan rami mancaliak inyo.
 sudah tu apak-apak ibuk-ibuk, bialah amak ko karumah ambo sajo. Dirumah ambo lai ado saketek banyaknyo untuak dimakan. Mari mak karumah ambo Iben mambaok amak nan kalaparan tadi karumahnyo untuak diajak makan. Warga nan lain bubar dari mancaliak rumah Karina.
Sasudah kajadian itu, Iben bersyukur samo iduiknyo nan masih cukuik untuak pambali makan, bialah indak bisa pambali barang maha nan mambuek manusia ongeh sarato kikik jo barang nan dipunyo.
Babarapo hari kamudian, sore biaso Iben alah tibo dirumah sedang malapeh panek duduak di rumah. Karina manuruik rumah Iben jo bajalan kaki karano rumah kaduonyo nan dakek. Dikatuak-katuak lah pintu rumah Iben di sore hari tu.  Assalamualaikum sorak Karina. Pas pulo Iben alah pulang karajo mambukakkan pintu.
 waalaikusalam, ado apo Karina?  tanyo Iben heran jo kadatangan Karina.  ambo kasiko nio mintak maaf, salomoko ateh kalakuan ambo. Tarutamo Iben tatanggo dakek nan alah lamo alum pernah basilahturahmi lai. Ambo manyadari kalakuan ambo salamo ko indak baiak. Ambo baniaik ndak ka maulangannyo lai tarang Karina.
 MasyaAllah, Alhamdulillah buk Karina. Buk Karina alah di agiah hidayah samo Allah SWT jo nan mambukakan hati buk Karina. Ambo alah lamo maafan buk Karina sabalun Ibuk mintak maaf. Semoga ibuk istiqomah Aamin jawek Iben
 aamiin, tarimo kasih yo Iben. Ambo hanyo nio manyampaian itu kamari, ambo nio karumah warga nan lain pulo manyampaian baliak . Assalamualaikum Karina pamit.
 jadih buk Karina, waalaikumsalam  Iben masuak kadalam rumah baliak.
Jadi sasudah warga mangataui niaik Karina salomo ko, warga nan main sosial media akhianyo tau pulo karano ado salah-satu warga sosial media nan ado waktu Karina mangecekan niaik nyo tu. Sosial media Karina pun ndak ado nan manyukoi jo mamuji lai karano hanyo panuah jo nasihat-nasihat urang untuak Karina. Satalah mambaco sakian banyak nasihat untuak inyo, Karina sadar kalau masih banyak urang nan paduli samo inyo walaupun inyo ndak peduli samo urang lain jo ndak baniaik paduli samo urang lain. Untuak manabauih kasalahannyo, karina mamintak maaf ka warga kampuang jo warga sosial medianyo. Tarutamo ka iben, karina partamo kali manuruik rumah Iben karano Iben adolah tetangga dakek jo maraso alh basalah ka Iben.