TAIBO HATI MANDE

Nadia Pertiwi

Mahasiswa Jurusan Sastra Daerah Minangkabau, Fakultas Ilmu Budaya,  Universitas Andalas.

Pado maso dahulu maso mandeh manganduang anak dalam kanduangan.  Badoa mandeh supayo anak lahia sehat jo salamaik.  Baharok bana mandeh untuang isuk jikok lah lah gadang anaknyo bisa jadi anak nan sholeh jo dimurahkan sajo rasakinyo. Lah tibo wakatunyo untuk anak dilahikan. Katiko anak alah lahia langsuang dikumandangkan adzan dek bapaknyo. Sungguh balimpah kasih jo sayang urang tuo ka anaknyo. Sairiang bajalannyo wakatu indak taraso sajo anak alah baranjak sakolah. Basakolahan jo di didik anak saelok mungkin. Sumbayang jo mangaji indak pernah tingga. Mancalik tumbuh kambangnyo anak sungguh gadang bana hati mandeh untuang nantik lai kajadi anak nan baguno jo elok laku. Satiok sumbayang indak pernah mandeh lupo untuk mandoakan anaknyo supayo anaknyo bisa jadi urang.  Kini anaklah gadang alhamdulillah jadi urang kasadonyo takabu juo doa mandeh. Indak sio-sio pancarian mandeh untuk mansakolahan anak nan kini alah nampak hasilnyo.  Anak nan alah dilahian mandeh jo bataruh nyao dulu ketek tasabuik elok laku. Lah gadang pulo mangko barubah pilakunyo babandiang tabalik jo maso keteknyo.  Kini tasabuik urang sakaliliang tasabuik anak durako ka mandeh. Tiok wakatu diingekan mandeh ka anaknyo untuk sumbayang tapi indak dilakuan anaknyo. Nasihat mandeh indak didangaannyo dianggap sajo mandehnyo bak angin lalu. Acok taibo hati mandeh maliek anaknyo nan dulu patuh dan rajin sumbayang kini jadi anak palawan ka mandeh dan indak namuh sumbayang.  Kadang tapiki dek mandeh bak a mangko anaknyo bisa barubah sajo pilakunyo hanyo sakijok mato. Apo sajo nan dikecekan jo diajakan mandehnyo taruih dijawek dilawannyo. Elok jo lunak sajo kato mandehnyo mangareh sajo jaweknyo.  Acok taluko hati mandeh jo kato-kato anaknyo. Suatu katiko bapak dari anak ko maningga dunia.  Bapak maningga diumua nan lah tuo itu maninggaan harato untuk bini jo anaknyo.  Untuang ado kabagantuang iduik dek mandeh.  Alah bana anaknyo bakarajo indak pernah agak sakalipun maagih lanjo mandeh. Ditinggan rumah jo tigo buah ruko sapaninggalan bapak. Rumah katampek bataduh anak jo mandeh nan ruko disewakan nyo untuk katampek bagantuang iduik.  

Alah batahun-tahun usai kamatian bapaknyo. Anak bakato kamandeh baso lah siap untuk bakeluarga. Anak diparalekan mandeh jo laki-laki pilihannyo. Sungguh gadang bana ati mandeh mancalik anaknyo basandiang dipalaminan. Namun sausainyo alek mandeh dikajuikan mandanga baso anaknyo indak tingga jo mandeh malainkan nio iduik surang pulo bapisah dari mandeh. Inyo nak marantau katanah jawa dan ikuik lakinyo.  Mandanga itu mandeh tadiam sajanok bapiki tega bana anaknyo maninggan mandeh sabatang karo maingek bapaknyo alah indak ado lai. Tasuruik tangih mandeh mandanganyo. Jo barek hati mande marilakan anaknyo pai harok juo mandeh jikok dicalik juo gak sakali-kali mandeh dikampuang. Alah batahun-tahun usai kapai an anaknyo marantau di tanah jawa. Anak indak pernah maagih kaba mandeh ataupun pulang agak sakali se mancalik mandehnyo dikampuang. Satiok rayo urang rantauan taruih pulang kakampuang halaman nak sobok jo keluarganyo.  Tapi anaknyo indak samo sakali. Kadang tapiki dek mandeh usah diharok anaknyo pulang. Anaknyo indak paduli kamandeh.  Manangih  mandeh manangguang rindu.  Bakato baranak lai tapi raso indak samo sakali. Didoakan juo dek mandeh sambi manangih bulih sehat juo anaknyo dirantau urang.