PUSARO AYAH

Oleh :Nadia Pertiwi

Mahasiswa Jurusan Sastra Minangkabau, Fakultas Ilmu Budaya, Universitas Andalas

Dahulu katiko Aisyah masih baumu sambilan bulan. Alun luruih mangecek jo jalan nyo. Kurang labih duo puluh tahun sudah Aisyah ditinggakan ayahnyo. Dulu ketek Aisyah alun ngarati apo-apo, namun kini Aisyah alah baranjak dewasa dan tumbuh jadi anak nan rancak rupo jo elok laku. Karano lah sajak dari keteknyo Aisyah digadangan tampa sosok ayahnyo. Aisyah mulai baranikan diri batanyo ka mandenyo tentang mendiang ayahnyo. Lah sapatuiknyo pulo mande mancaritokan nyo.  Dicaritokan kapado Aisyah tentang ayahnyo yang dulu nyo bakarajo sabagai sopir angkutan umum itu, samaso iduiknyo iyo tasabuik dek urang banyak sabana lunak, elok laku, ramah dan panyayang ka anak bini maupun ka urang lain.  Alun tabik matohari ayah Aisyah alah bagageh untuk pai manambang. Pulang-pulang nyo dari manambang matohari alah tabanam. Wakatu pai anak-anak masih lalok, malam hari katiko pulang karajo sajo ayah bisa basobok jo anaknyo. Ayah bakureh untuk katigo anak bininyo. Jo hasil pitih pai manambang itulah ayah bisa mambalian apo nan ka dimakan, lanjo sikolah jo pambali susu Aisyah katiko itu. Sampai indak sampai pitihnyo iyo diusahokan bana dek ayah untuk mancari kapancukuiknyo. Uda Ari marupokan anak partamo dan anak paliang gadang. Katiko mandiang ayah maningga Ari baru baumu limo baleh taun. Ampek baleh tahun jarak antaro Ari jo Aisyah adiknyo nan paliang bungsu.  Dicaritokan pulo kapado Aisyah maso dulu katiko libur sakolah Ari acok dibaok ayah pai manambang. Dan maso-maso itulah maso yang marupoan kanangan nan indak talupoan dek uda Ari jo Ayah. Carito tantang ayah nan dicaritoan mande jo uda Ari kapado Aisyah manandokan ayah iyolah urang nan elok jo panyayang. Namun disayangkan sosok ayah indak pernah dirasoan Aisyah karano katiko itu Aisyah masih ketek dan alun tau apo-apo saat ditinggakan ayahnyo. Aisyah maraso bahasonyo masih baruntuang uda Ari bisa maliek dan batamu ayah usai kapulagan ayahnyo. Aisyah berandai jikok ayahnyo masih iduik pastilah Aisyah bisa marasokan sanangnyo bisa iduik jo keluarga lengkap yaitu ayah mande, uda Ari dan Aisyah. Tapi tuhan bakahandak lain, tuhan labih sayang pado ayah mangko ayah dipanggi yang maha kuaso talabih dulu. Maningga nyo ayah dikaranoan panyakik turunan nan didarito ayah batahun-tahun lamonyo. Saat sabalun ayah maninggakan mande uda Ari dan Aisyah, bapasan ayah pado mande supayo mande bisa manuntun anak-anak manjadi anak nan sholeh jo sholeha. Sapaninggalan ayah mandehlah nan baperan ganda sebagai ayah sekaligus ibu bagi Ari dan Aisyah. Ayah dipusarokan dipamakaman kaum diateh bukik.  Satiok kamasuk bulan suci Ramadhan, Aisyah, mande jo uda Ari rutin kapusaro ayah. Mambarasihan pusaro ayah jo mandoakan ayah supayo dilapangkan kubu jo dimaafkan sagalo kasalahan ayah samaso iduik. Ziarah ka pusaro ayah alah jadi tradisi Aisyah dan keluarganyo satiok bulan Ramadhan.