Baringin di Tangah Padang

Karya : muhammad satria erlangga mahasiswa jurusan sastra minangkabau UNAND


Hari sanjo lah tibo, nampak urang lah banyak baliak dari sawah untuk pulang ka rumah. Mambao banyak alaik paragaik untuaknyo cari nafkah, kok lai untuang dapek istirahat dirumah jo keluarga. Antaro sabanyak tu petani salah satunyo iolah Bakrie jo anaknyo Buyuang  mambaok tajak jo rantang nasi. Satibonyo dirumah langsuang disambuik dek Ramlah, bini Bakrie.

“lah sudah batanam sawah nan sapiriang tu pak?” tanyo Ramlah sambia mambarasiahan tajak jo rantang nan dibaok laki jo anaknyo tadi.

“alah sudahnyo buk, pak mandi lu yo. Sadioan se teh angek beko.” Bakrie pai ka dalam rumah, maninggaan bini samo anaknyo nan sadang mambarasiahan siso nasi di rantang.

Nasi lah talatak di tangah rumah samo sambanyo bagai, disinan lah duduak Bakrie samo Ramlah manunggu Buyuang nan sadang mandi. Sambia manunggu buyuang tibolah ota Bakrie jo Bini nyo ka calon bini untuak si Buyuang.

“buk, jadi baa nan apak sabuik ka patang? Lah ado buk sampaian ka si Buyuang? Maso awak ka manjodohannyo samo kamanakan apak si Ramani?” ucap Bakrie sambia maminum teh angek nan disadiokan bininyo tadi. Nampak Ramlah nan mandanga kato-kato suaminyo agak galisah, tando ado perasaan indak lamak nan inyo rasokan.

“alun lai Pak, agak takuik hati rasonyo. Raso ka Buyuang ka manulak jo berang. Kan apak tau baa sipaik si Buyuang tu, nyo kareh kapalo, apo yang indak tu yo indak dek inyo”. 

Alun sempat Bakrie manjawek kato bininyo, tibolah Buyuang nan tadi sadang mandi. Satibo Buyuang, lanjuik makan lah sadonyo nan di tangah rumah tu, dek paruik lah litak baliak dari sawah tadi.

Sasudah makan, Ramlah mambarasiahan siso makan. Maninggaan teh jo goreang pisang nan alah dibuek tadi. Tingga lah Buyuang samo Apak nyo di tangah rumah. Bakrie maminum siso teh di galehnyo dan mamulai kecek.

“Yuang, si Rohana adiak kanduang ang lah anam bulan barumah tango jo urang kayo nan di mudiak. Kini tinggalah waang yuang, alah saminggu sajak niniak mamak sapakaik untuak manjodohan ang samo Ramani kamanakan apak nan di baruah, tibonyo pulang kabako. Baa manuruik buyuang tu?

Buyuang tasintak mandangaan kato-kato apaknyo, agak lamo tamanuang karano dak tau apo nan ka dijawek. Sakileh takana Nurlela, anak gadih kampuang sabalah nan alah dakek samo buyuang, alah tasabuik janji untuak barumah tanggo.

“baa kok apak ambiak kaputusan surang-surang sajo? Baa kok dak batanyo dulu ka buyuang, di paso pulo buyuang untuak manjalin rumah tanggo jo Ramani, kan apak tau, rumah tango ko bisa tajalin kalau kaduonyo suko samo suko. Ambo dak tarimo do pak, ambo dan nio jo Ramani do, ambo lah ado dapek calon surang, anak kampuang sabalah, Nurlela namonyo.”  Buyuang manjawek dengan nada nan agak tinggi, karano lah paneh samo kalakuan apaknyo untuak manjodohan.

“sabana lancang waang kini, darima ang baraja malawan? Lah pandai pulo malawan apak. Apo kurangnyo Ramani? Cacek indak, salah atau jangganyo kan indak ado. Waang pun lah kenal jo inyo, dari ketek lah samo bamain. Kamanakan kanduang dek badan denai, harato banyak, basawah laweh pulo, rumah gadang inyo pun tapandang. Kini baitu lah dek waang, piliah antaro duo, nikah jo Ramani atau ang pai dari rumahko.” Bakrie nan alah berang langsuang tagak dan pai maninggaan Buyuang surang, Buyuang nan alah bulek keputusannyo pun lah dapek apo nan ka di lakuan.

Bisuaknyo Buyuang lah mangamehan baju, mambaok ciek tas ketek, nampak Ramlah manangih di pintu biliak, mamaso buyuang untuak manuruik an kato apaknyo dan dak pai dari rumah.

“ondeh buyuang, ang turuikan sajo lah kato apak ang tu. Jan lah ang tinggaan rumah ko jo kondisi nan dak elok, dak ibo ang caliak mandeh ang ko?” Ramlah manangih juo, maliek anak laki-laki nan ka jadi tulang pungguang dirumah, pai jo kondisi nan dak elok.

“usah mandeh manangih, Buyuang pai sabanta nyo mandeh. Lah sukses buyuang dirantau buyuang janji ka mambuek sanang mandeh jo apak. Jadi mandeh tunggu sajo ditumah, insyaallah Buyuang capek baliak. Do’a kan sajo buyuang salamaik dunia jo akhiraik.”

Buyuang tetap di kato hatinyo, keputusan alah bulek. Bialah inyo marantau dahulu cari razaki untuak kedepannyo. Untuak mampasuntiang Si Nurlela pujaan hatinyo, bialah inyo pai tanpa persetujuan apaknyo dulu, beko nyo lah sukses nyo akan baliak ka rumah jo minta maaf ka apaknyo. Buyuang pun pai pagi hari, tanpa di asuang samo apaknyo karano Bakrie dak nio basuo jo Buyuang sampai buyuang manuruikan kato inyo.

Lah 3 tahun lamonyo buyuang pai marantau, kaba nan terakhir kali dapek dek Ramlah hanyolah maso buyuang buka usaho di rantau dan Alhamdulillah lai bajalan taruih.

Salamo itu pulo lah Nurlela acok tamanuang surang, mamikiaan baa keadaan buyuang di rantau, takuik Buyuang ka pindah hati jo urang situ atau Buyuang alah barumah tango dahulu tanpa Nurlela tau. Sadonyo pemikiran tu mambuek Nurlela dak salero makan dan rumah pun dak takamehan lai do. Mandeh Nurlela alah risau pulo mancaliak anak gadihnyo nan macam itu, dihampirinyo Nurlela sambia mambaok teh angek.

“Nak minum lah dulu teh ko, anak alun ado makan dari pagi lai. Risau mandeh malieknyo, takuik Nurlela sakik. Ado apo tu? Jalehan lah ka mandeh, bia tantu apo nan ka mandeh lakuan, matauan mandeh ado solusinyo bagai atau mandeh balian ubeknyo”

“Lela dak sakik do mandeh, tapi baa yo payah manjalehannyo. Dak salero Lela makan do, kok malam dak nio lalok, tabayang juo urang nan jauah, nan sadang manggaleh di rantau. Samanjak inyo pai tigo tahun lalu, kaba barito indak juo dapek , antah bilo inyo ka pulang, itu nan mambuek Lela rusuah mandeh.”

“jan lah anak risau, mandeh tau Buyuang tu urang nan batanggung jawab, elok parangainyo, kok lah ado janji nyo samo Lela, kok dak ado ambeknyo pasti ka inyo tepati. Lela tunggu sajolah nyo, bado’a untuang inyo sehat-sehat sajo, dan usahanyo lancer.”

“mandanga kato amak lai sanang hati Lela dek nyo, lela sarahan se sadnyo kini kan tuhan nan di ateh. Lah masak awak lai mak, beko apak pulang alun pulo makanan taidang.”

Tibo-tibo tadanga urang basorak dari lua rumah Nurlela, manyorak an maso Buyuang alah pulang.

“yobana tu uda? Lah dimano Buyuang tu? Bia Lela turuikan” Nampak galak nan lah lamo dak Nampak dari roman Nurlela, sumangaik nio basuo pujaan hati nan lah lamo dak batamu.

“nyo baru tibo di stasiun, turuikan lah.”

Lela langsuang baliak ka dalam rumah, manuka baju nan rancak untuak basuo jo Buyuang. Dalam hati Lela batanyo-tanyo baa bantuak Buyuang kini, lai sarupo dulu atau lah beda. Dak lamo Lela langsuang kalua rumah, pai ka stasiun samo becak nan lewat dimuko rumah. 

Satibo di stasiun Lela mancari-cari keberadaan Buyuang, lah ampia 15 menit inyo mamutai stasiun, batanyo kasinan Kamari, akhirnyo nampak laki-laki mambelakangan Nurlela, caro tagaknyo masih samo, dan potongan rambuiknyo pun masih samo. Lela langsuang tau maso itu ado lah Buyuang. Lela turuikan Buyuang, tingga jarak 3 meter diantaro kaduonyo dan Buyuang mamuta badannyo. Disitulah kaduo mato batamu.

Buyuang lah tibo di pakarangan rumahnyo, sudah nyo antakan Nurlela pulang. Agak ragu untuak mangatuak pintu, bimbang hati untuak maimbau. Akhirnyo Buyuang ketuk pintu rumahnyo, dak lamo sudah tu kalua lah Bakrie. Wajah Bakrie barubah mamerah, inyo langsuang mamaluak Buyuang mambuek Buyuang dak tau apo nan ka di kecekan.

“maaf an lah apak yo buyuang, apak lah babuek sakandak hati apak. Dak mamikia an baa perasaan Buyuang. Dak pulo batanyo sabalum mambuek keputusan. Salamo tigo tahun apak jo amak maraso kahilangan, makan dak basalero, mato nan namuah lalok. Akhirrnyo Buyuang pulang kini, lega hati apak Buyuang lai sehat-sehat sajo”

“iyo pak, maaf pulo Buyuang alah malawan samo apak jo maninggaan rumah. Tapi kini buyuang janji ka manyanangan apak jo amak. Alhamdulillah apak jo amak dirumah lai sehat sehat sajo. Lah kadalam awak duduak lai pak, amaknyo lai di dalam?”

“ha iyo, capek lah duduak ka dalam. Amak nyo lagi masak di balakang. Bia apak imbau nyo beko”

Masuak lah Buyuang jo Apaknyo ka dalam rumah, duduak diruang tamu sambia maota, malapeh rindu nan lah tigo tahun lamonyo dak batamu.