Valentine, Indak Budayo Minang

Penulis : Lhara Prosa

Mahasiswa Sastra Daerah Minangkabau. Fakultas Ilmu Budaya. Universitas Andalas

Di balahan dunia mano pun ndak ado urang tarutamo anak mudo-mudo nan indak tantu jo hari kasih sayang atau biaso disabuik valentine day. Hari kasih sayang ko dirayoan pado tanggal 14 Februari, sado kaula mudo marayoannyo, indak katinggalan pulo anak mudo-mudo Minangkabau.  Valentine tu biaso di sabuik sebagai hari kasih sayang. Hari dia urang urang khususnyo kaum Mudo anak zaman kini sibuk marayoan dan mamikian kado kado apo yang ingin diagiah ka urang nan disayang. Bisa barupo Bungo,coklat atau sekedar Pai jalan Baduo. Baduo duo yang indak muhrimnyo. Nan pasti adalah hal nan buruak yang Ndak buliah dilakukan di nagari kito tacinto , Minangkabau. 

Padahal kalau dikaji bana, marayoan hari kasih sayang ko batantangan jo adaik Minangkabau. Bukan tanpa alasan kato-kato tersebut. Di adaik kito anak bujang jo anak gadih indak lah patuik pai baduo tanpa ado nan mangawani. Banyak kini anak mudo-mudo nan alah lari dari adaik. Indak tau lai ma nan patuik ma nan indak. Babuek sakandak hati . Untuk marayoan hari kasih sayang ko. anak mudo-mudo di hari kasih sayang  pai kalua untuk marayoannyo, saliang batuka kado. Nan labiah parahnyo banyak nan babuek nan alun sapatuiknyo pabuek, hanyo untuak mambuktian kalau nyo sabana sayang jo pasangannyo.

Pado hakikaiknyo manunjuk an kasih sayang tu bukanlah hanyo saat hari khusus. Hari kasih sayang tu satiok hari. Dan indak pulo hanyo samati-mato ditujuan ka untuak pasangan, apo lai pasangan ko alun halal. Kasih sayang nan paliang nomor satu bana ka urangtuo, nan alah manggadangan dan mandidik. Ka keluarga lainnyo sarupo adiak, kakak, uwak, gaek, mamak, dan nan lainnyo. Ka urang gaek khususnyo, bisa diungkapkan dengan caro mahormati dan mahargai. Dengan mahormati dan mahargai alah labiah dari ungkapan kasih sayang yang Wak agiah

Di alam Minangkabau awak hiduik di bawah aturan nan alah ditatapan. Indaklah sapatuiknyo awak sebagai generasi nan ka manaruih an tradisi ko babuek di lua aturan. Awak harus senantiaso manjago nilai-nilai luhur budayo awak. Karano marayoan hari kasih sayang bukan budayo awak, jadi indaklah bijak kalau awak mambudayokan tradisi marayoan hari kasih sayang ko. Lakuan hal yang indak marusak norma nan alah Ado , manjunjuang tinggi norma norma itu. Indak marusak dan manggeser Jo hal nan indak elok. Mancontohan hal elok ka urang banyak. Sabab wak hiduik Basamo , basosial banyak nan ka mancontoh. Jan agiahan contoh buruak ka urang lain.