Maso Depan Nan Jo Hati Sajalan

Kisah awalnyo bamulo katiko padusi nan banamo Keysa marantau ka daerah Sumatera Barat untuak manjalani maso perkuliahan. Awalnyo Keysa  maraso cangguang tingga di kota Padang, dek karano Keysa hanyo tingga surang diri, indak ado dunsanak nan dakek do. Keysa lai barasa dari tanah minang atau biasonyo disabuik gadih minang, tapi inyo gadang didaerah rantau. Keysa nan indak pandai bana babahaso minang tu manjadi payah untuak bersosialisasi jo kawan-kawan nyo di kampus. Keysa paham katiko ado urang nan mangecek Bahaso Minang tapi katiko inyo majawek agak tapayah inyo, malah acok jadi indomi (Indonesia Minang) bahaso yang nyo pakai dek Keysa. Di kota Padang keysa hanyo tingga di kos nyo nan indak jauah dari kampusnyo.
Sabalun Keysa maminjakan kaki ka Kota Padang untuak pai kuliah, amak jo apaknyo bapasan kapado Keysa. Amak jo apak nyo keysa lai urang minang asli, tapi dek Keysa ko nyo kurang paham bana Bahaso Minang. Jadi agak lawak caro panyampaian nyo, dek karano amak jo apaknyo pakai Bahaso Minang nan Keysa manjawek pakai Bahaso Indonesia.
“Kak beko kalau lah tibo di Padang, elok-elok yo kak, jago diri kak jan sumbarang bakawan jo urang caliak-caliak dalam bakawan tu, kakak urang pendatang disinan ma” kecek Amak Keysa kapado Keysa sambia manahan isak tangih, tapi dek ibo hati malapeh anak gadih pai ka tampek urang akhianyo tajatuah juo aia mato Amak Keysa tu.
“Iya ma kakak akan jaga diri kakak, kakak akan selalu inget pesan mama dan papa. Mama jangan sedih nanti kakak juga sedih” itu kecek Keysa sambia taisak-isak manangih. Kalau dalam bahaso minang kecek Keysa tu adolah “ iyo mak akak pasti akan jago diri kak, kakak taruih ingek pasan amak jo apak. Amak jan basadiah kalau amak basadiah akak ikuik lo sadiah mancaliak amak taka itu”.
Sambia manangih Keysa maambiak aia ka sumua, dimasuakan nyo aia tu ka dalam embe. Aia nan nyo ambiak tu untuak mambasuah kaki amak nyo. Sasudah nyo ambiak aia tu taruih nyo pai ka ruang tamu tampek dimano amaknyo sadang duduak.
“Manga ko kak?” kecek Amak Keysa nan binguang mancaliak anaknyo tibo-tibo mambaok aia saembe.
Indak ado jawek dek Keysa nan ado hanyo tangih Keysa jo aia matonyo nan mailia dareh taka aia hujan. Keysa langsuang balutuik dihadapan amaknyo. Embe nan nyo baoknyo dilatakan di bawah. Langsuang nyo ambiak kaki amaknyo dek Keysa, nyo masuakan kaki amaknyo ka dalam aia nan di embe.
“Ma.. ridhoi perjalanan kakak yaa. Semoga kakak bisa merubah nasib keluarga kita. Mama papa disini jangan pikirin bagaimana kehidupan kakak disana. InsyaAllah Keysa bisa ngejalaninnya mah” Keysa mangecek tapatah-patah dek karano sambia manangih. Di lap nyo kaki amaknyo dek keysa jo aia yang ado diembe. Amaknyo mancaliak keysa takah itu makin manjadi tangih nyo. Nan amaknyo lakukan hanyolah manangih dan mausok lambuik kapalo Keysa.
Alah tibo Keysa di kota Padang. Disikolah perjalanan hiduik maupun perjalanan kisah cinto Keysa dimulai. Walaupun tujuannyo Keysa ka Padang untuak kuliah tapi namonyo seorang manusia nan normal paralu lah mampunyoi balahan hati. kalau kcek urang zaman kini tu pacar haha.
Sabalun maso perkuliahan dimulai, biasonyo ado maso pengenalan wilayah kampus untuak MABA(MAhasiswa BAru) ataupun pengenalan maba satu samo jo nan lain.
Banyak pulo mahasiswa parantau nan kuliah di Padang, jadi indak hanyo urang-urang Padang se nan kuliah di Padang. Ado pulo urang Surabaya, Kalimantan, Batam, dsb. Keysa nan barasa dari Kota Metropolitan indak terlalu cangguang karano ado kawan nan indak pandai Bahaso Minang.
Keysa salah satu padusi nan mudah mandapekan kawan di lingkuangan baru. Jadi mudah se untuak Keysa mandapek an kawan, walaupun ciek kesulitan Keysa yaitu mangecek jo kawan nan ndak pandai Bahaso Indonesia. Kini Keysa lah mulai masuak ka perkuliahan semester 1.
Awal kuliah Keysa maraso “Apolah jurusan den kini ko???? Apo aden salah maambiak jurusan?? Jurusan nan den ambiak kini ko mampasulik den ya Allah” garumam Keysa dalam hati, tetap masih mamakai Bahaso Indonesia.
Salah satu caro nan Keysa lakuan untuak capek pandai babahaso minang, Keysa acok main jo bakumpua jo kawan-kawannyo nan urang minang. Kalau kawan nan ndak pandai bahaso minang tantu indak payah bana do soalnyo kan si Keysa surang kan lah padai Bahaso Indonesia.
Sadoala acara nan ado di fakultas nyo ikuikan dek Keysa. Mulai dari acara ketek di fakultas sampai ka acara gadang fakultas diikuik sertakan oleh Keysa. Acara nan nyo lakuan dek Keysa di bimbiang dek kakak tingkat nan ado di fakultas Keysa. Banyak dari kakak tingkat Keysa batanyo kapado inyo. “Keysa baa kok nio kuliah di Padang? Kan di tampek Keysa labiah rancak dan berkualiatas kampusnyo.”
Lalu Keysa manjawek pakai Bahaso Minang walaupun acok kanai galak dek kakak tingkatnyo itu “iyo Keysa nio nyo disiko tu baa lai bang. Lagian kan nan berkualialitas tu tergantung dari diri awak surang nyo bang.”
“Ohh lah pandai kini bahaso minang yoo?? Lah padiah bana bahaso minang Keysa kini ma.” Kecek salah satu abang nan mandanga kecek Keysa. “Iyo bang lah bara bulan tingga di Padang ko masak iyo ndak yo pandai Bahaso Minang do. Tapi alah yo kecek urang dima bumi dipijak, disitu langik dijunjuang bang”. Mandanga kecek Keysa nan taka urang lah pandai bana Bahaso Minang tasumbua galak abang jo kakak di sinan.
Salamo semester satu Keysa lah mulai mamatuik matuik laki-laki nan ado di wilayah kampusnyo itu. Banyak nan dakek jo Keysa, tapi indak ado nan masuak ka hati keysa do. Keysa hanyo manjadian laki-laki itu kawan ataupun sekadar abang sajo. Keysa nan masih mancubo mandakekan diri atau bersosialisasi jo daerah baru tantu paralu selektif dalam mamiliah laki-laki. Bacaliak dulu baa gaya atau parangai laki-laki dikampusnyo itu. Tapi baliak lai alun ado nan ado tasangkuik dihati Keysa, karano Keysa masih tabayang bayang jo mantan pacarnyo nan lamo.
Keysa tipikal padusi nan panyayang jo sulik untuak malupoan urang nan disayang. Jadi kok lah sayang abis tu bapisah payah untuak Keysa malupoan urang tu.
“Ndehh baa ko kok inyo se taruih nan takana dek aku yo, aku nio bahagia pulo, aku ndak nio bayang-bayang inyo tu taruih ado di pangana aku. Tolong lah ilang pangana itu aaa” manggarutuk Keysa dalam hati.
Semester satu lah dilalui Keysa. Keysa lai padusi nan lumayan cadiak haha. Kisah cinto jo pendidikan nyo lai sajalan. Alhamdulillah Keysa mandapekan Ip nan cukuik tinggi yaitu 3.49. Bagi seorang mandapek an IP 3 tu lah pasti sanang bana.
Lah kalua nilai Keysa, langsuang nyo telpon amaknyo dek Keysa. Kadang Keysa manggia amaknyo “amak” kadang “ama” jadi suko suko hati nyo se dek Keysa tu.
Tut...tut....tut.... *bunyi telpon keysa manalepon ka ama nyo
“Assalammualaikum ma”
“Walaikumsalam kak, ado apo kak? Baa kaba akak di sinan?”
“Indak ado do ma akak cuma nio mangecekan ka ama kalau akak lah siap UAS tu nilai kak lah kalua lo, jadi kini akak lah libur ma. Kaba akak disiko lai sehat-sehat se nyo ma. Ama jo apa jo adiak-adiak baa disinan?”.
“Alhamdulillah lah kak kalau lah siap kak, tu baa nilai akak? Lai rancak kak?. Ama jo apa jo adiak-adiak lai sehat se disiko nyo kak alhamdulillah. Tu baa kalau lah libur ndak ka pulang kak kasiko?”
“Nilai nyo rancak ma alhamdulliah lah ma. Kok buliah akak pulang dek ama akak pulang ma”
“Alhamdulillah lah kak kalau taka itu. Pulang lah kak ndak baa do. Beko ama balian tiket untuak akak pulang kasiko dih”.
“ Iyo ma, makasih yo ma, alah yo ma sampai siko dulu dih akak ka mambarasian kamar dulu yo akak ka lalok lai”
“ Iyo kak samo samo, kalau akak sanang, ama labiah sanang lo mah kak jadi jan cangguang untuak mintak apo- apo ka ama yo. Iyo barasian lah lai jan lupo solat dulu kak sabalun lalok”
“ Ndehh ama lai bisa se taka itu haha, iyo ma kalau solat lah sudah akak ma tingga lalok se lai nyo, assalamualaikum ma”
“ Rancak lah kalau alah kak, walaikussalam kak”
Tut... mati telpon Keysa jo ama nyo.
Sasudah manalepon jo ama nyo Keysa langsuang mambarasian kamar jo tampek laloknyo karano inyo ka lalok.
Bisuak pagi katiko jago laok Keysa mandapek wa dari ama nyo “kak tiket alah ama pasan yo iko kode bookingnyo. Hati hati kak beko kalau alah sampai disiko bia apa yang manjapuik akak di bandara”
Mancaliak pasan wa dari ama taka itu sanang bana raso hati Keysa, dek karano inyo ka basuo jo keluarganyo nan alah lamo indak basuo gara-gara Keysa pai marantau ka Padang.
Alah tibo Keysa dirumah nyo, lah basuo nyo jo keluargo nyo. Dinikmati nyo liburan nan kurang labiah sabulan itu untuak menghibur dirinyo, karano salamonyo tingga di kos kan surang dan mungkin suntuak pangana keysa jadi liburan ko adolah waktu nan paliang tapek untuak Keysa manyanangan utak jo badan.
Habih lah maso liburan Keysa. Alah ka baliak nyo ka parantauan maninggan urang nan nyo sayang dirumah. Jo ibo hati nyo pai tapi baa lai, sadoala yang nyo laukan itu untuak mambangkik an batang tarandam keluarganyo kok untuang lai barubah nasib keluarga nyo dek Keysa ko.
Lah masuak Keysa ka semester 2. Katiko disemester 2 ko Keysa alah bisa manarimo sanang jo suliknyo yang dihadapinyo di jurusan nan nyo ambiak.
“Mungkin alah iko jalan denai ma, iko lah takadia dari nan kuaso. Baa ka baa harus denai jalani” gumam Keysa dalam hati katiko inyo bajalan ka masuak ka dalam kelas.
Di dalam kelas nyo Keysa punyo banyak kawan. Kawan Keysa banamo Ratu, putri, Tasya, Dewi, Bila. Tapi nan paliang dakek jo Keysa banamo Ratu. Sabananyo dakek sadoala nyo, kalau pai kama-kama pasti Keysa jo urang-urang itu. Tapi pasti lah satiok urang kalau bakawan paralu nan dakek bana, nan bisa memahami baa diri awak, jadi Keysa labiah dakek jo Ratu.
Sabulan sudah tajalani semester 2 dek Keysa. Sabana capek rasonyo waktu bajalan. Nan Keysa taruih sumangaik pai kuliah karano niaiknyo ka marubah nasib keluarga nyo.
Katiko hari libur Keysa indak ado pai ka kampus do. Keysa hanyo baleha-leha dikos. Tapi sabalunnyo baleha-leha sadoala karajo nan di kos tu lah siap nyo karajoannyo, taka misalnyo cuci baju, cuci pinggan, sapu sarok, buang sarok, dan banyak nan lainnyo taka karajo induak-induak di rumah. Keysa nan hanyo tingga surang di kos jadi harus rajin dan malakukan itu sadoala nyo surang tanpa bantuan sia-sia.
Keysa nan sadang lamak manonton tv di kamarnyo, tibo-tibo hp nyo mandariang ado notif dari instagram. Intagram adolah salah satu sosial media yang bisa memudahkan urang untuak berkomunikasi walaupun jauah dan indak kenal satu samo lain. Nan dapek dicaliak di situ foto-foto jo video-video.
Tling..... *bunyi hp Keysa
Langsuang dicaliak dek Keysa.
Ado pesan dari akun @muhammad alif “follback lai buliah”
Follback itu adolah sebutan untuak manarimo permintaan bakawan di instagram.
“Ihh sia lah ko a. manga nyo mintak-mintak follback, kenal se indak do mah. Eh tapi caliak lah dulu nak profilnyo, mano tau kan lai mantap” gumam Keysa dalam hati dan langsuang nyo caliak akun itu dek Keysa.
“Ehh lai urang awak yo ma. Iyolah ndak baa do follback se lah, bisa o jadi kawan kan” kecek Keysa surang diri.
Dibaleh nyo di Keysa “iyo bang lai buliah”.
Ndak lamo Keysa mambaleh pesan dari laki-laki itu, tibo lo baliak pesan dari urang itu.dan akhirnyo Keysa jo Alif chattingan di sosial media itu.
‘Kuliah di Padang yo diak?”
“Iyo bang dikampus hijau, abang dima kuliah?”
“Kalau awak dikampus kuniang diak. Lah semester bara diak?’
“Awak semester 2 baru nyo bang, kalau abang alah semester bara?”
“Ehh lai samo ma, abang baru semester duo lo nyo”
“Dima asa kampuang bang?”
“Abang urang parantau diak tapi lai urang awaknyo, abang dari kota Bandar Dunia Madani diak, kalau adiak?”
“Ihh kok samo taruih abang samo Keysa ko hehe. Keysa dari daerah kota Metropolitan bang”
‘Haha antahlah diak mungkin jodoh wak ma, lai buliah abang mintak nomor adiak?”
Ndak taraso dek Keysa lah nyaman lo chat samo Alif. Galak-galak surang Keysa dibuek nyo dek Alif itu. Tapi Keysa ndak nio masuak ka dalam lubang nan samo untuak ka duo kalinyo. Kini Keysa ndak nio malatak an hati ka sumbarang urang. Sakik hati tu padiah rasonyo. Payah dibueknyo indak namuah makan, indak namuah lalok, indak namuah pulo manga-manga do, lah bantuak urang gilo kalau sadang sakik hati tu. Keysa tahan diri Keysa bia ndak terlalu suko bana ka abang Alif ko. Lagian pulo Keysa jo Bang Alif ko alun pernah sobok lai dan mereka pun dari kampus nan babeda.
“Ihh baa lah abang ko kok bisa buek denai nyaman bana samo inyo, padahal baru bana kenal dan sobok se alun lai. Tapi jan dibaok jo hati Keysa beko sakik lo hati baliak. Laki-laki ko indak serius nampak nyo do ma. Hanyo mancari kawan untuak main-main se nampak nyo ma” gumam Keysa panjang dalam hati sambia mancaliak ka layar hp nyo.
Indak ado di baleh nyo dek Keysa lai. Alah maleh Keysa melayani chat dari Abang Alif itu.
Pagi hari nyo Keysa pai ka kampus, karano Keysa ado jadwal kuliah pagi. Indak taka biasonyo Keysa pai ka kampus, nampak jaleh beda raut wajah Keysa. Mancaliak kawan nan taka itu, kawan-kawannyo Keysa cameh takuik ado apo-apo.
“Dek a mu ca?” tanyo Putri kapado Keysa nan alah biasonyo panggia ca.
“Indak baa aku do, lai aman-aman se aku nyo” kecek Keysa baduto
“Tapi nampak dek kami, mu taka ado nan dipikian dan disuruak an dari kami, iyo kan guys?”
Jaleh Putri sambia mamintak jawaban dari kawan-kawan nan lain.
“Iyo Ca aneh mu hari kini ko” jawek kawan-kawan nyo Keysa kompak.
“Ndak baa aku do alah ma, aku nio masuak kelas lai” Keysa pai maninggan kawan-kawan nyo nan sadang taheran-heran jo sikapnyo.
Masuak Keysa ka dalam kelas. Duduak nyo di nan paliang ujuang surang diri. Mancaliak Keysa taka itu, Ratu nan konco arek Keysa bana ikuik lo masuak dan duduak disampiang Keysa.
“Ca dek a mu ca? Kok ndak nio mu carito tampek urang banyak, carito lah kini Ca lai awak baduo baru isi di dalam kelas ko nyo” kecek Ratu dan memang iyo kondisi di kelas tu masih langang alun ado sia-sia lai, soalnyo kelas pagi acok banyak nan talabek datang.
Keysa mulai manjawek jo ragu nan jo bimbang “Jadi giko Tu, malam tadi ado laki-laki dari kampus bawah ma chat Ca di Instagram.”
“Haaaa tu baa kok mu taka ayam kahilangan induak gitu, biasonyo kan lai banyak juo laki-laki nan machat mu kan Ca? Santai se mu nyo kan, emng apo nan urang itu kecek an ka Ca sampai Ca coiko bana? Lah bp gaek nyo Ca? “ tanyo Ratu kapado Keysa.
“Indak gitu do Tu, nyo lai elok ka aku Tu. Walaupun aku alun pernah basobok samo abang itu tapi aku lah nyaman samo inyo Tu. Abang itu lai sa bp jo awak Tu, ndak ado gaek nyo do. Abang tu mintak nomor aku Tu, harus atau indak aku agiah ka abang itu Tu?” kecek Keysa sambia mamainkan jari taka urang binguang.
“Sia namo abang itu Ca?. Kalau itu tasarah dek mu Ca, baa abang tu mandakek an mu lai elok-elok atau indak dan baa rasonyo kalau chat jo abang itu. Kok raso ka lai agiah lah ka abang itu Ca, mano tau iyo jodoh Ca abang tu.”
“Namo abang itu alif, Tu. Aku nyaman chat samo abang itu, padahal kami alun ado sobok lai tapi raso kayak lah lamo kenal. Jadi kalau manuruik mu aku agiah se kan?” kecek Keysa manjawek tanyo Ratu.
Sasudah Keysa mangecek kiro dosen lah masuak pulo, ndak tajawek tanyo Keysa nan terakhir itu dek di Ratu.
Samakin tamanuang Keysa sasudah bacarito jo Ratu. Tapi lai takana dek Keysa inyo kan sadang kuliah jadi inyo harus fokus dulu di kelas dan nyo tinggan dulu urusan lain nan mambuek pangananyo manduo.
Kelas lah siap dan mahasiswa pulang ka kos dan rumah nyo masiang-masiang baitu pulo Keysa. Alah sampai Keysa di kos, langsuang diambiak nyo hp di dalam tas. Niaik hati Keysa nio mambari nomornyo ka Alif, laki-laki nan ma chat nyo di Instagram.
“Iko nomor 0813xxxxxxx Ca, Bang” langsuang dibaco dek Alif, pesan Keysa itu.
Kurang labiah saminggu Keysa jo Alif chat di Whatsapp. Tibo suatu hari si Alif iko nekad video call Keysa jo Amak Alif. Indak tabayang dek Keysa kalau alif ka mangecek itu ka amaknyo dan sacapek itu.
Tut...tut...tut.... *suaro dering video call Alif nan tahubuang ka amak jo Keysa.
“Hallo assalamualaikum mak”
“Walaikumsalam dek, eh kok ado padusi dek, sia tu?”
“Itu calon adek, Mak”
Mandanga kecek Alif nan spontan taka itu, Keysa hanyo bisa galak-galak manih manahan malu.
“Ohh iko dek iyolah ndak baa do asa lai elok parangai jo sifatnyo, ndak hanyo elok ka adek sajo tapi elok ka keluarga adek, amak sanang ma, sia namonyo dek?”
“Haha iyo mak aamiin doakan sajo yo mak, namonyo Keysa mak, rancak kan? Sarancak urang nyo.”
Keysa nan indak mangecek saketek alah se dek karano malu, sagan, tacangang, campua aduak sadoala nyo. Ndak lamo video call itu mati surang se lai.
Keysa langsuang ma chat si Alif “Alif baa ko Alif mangecek taka itu tadi ka Amak? Kan Ca malu jadinyo, awak se alun pernah sobok lai, beko kecewa amak ka Alif”
Ndak paralu lamo manunggu langsuang dibaleh dek Alif “Alif nio serius samo Ca, samanjak partamo kali Alif chat Ca lah badatuak jantuang Lif, Ca. Kok itu bisa ma Ca bisuak sobok wak lai”
“Ca mungkin ado lo raso ka Alif ma tapi Ca takuik alif hanyo manjadian Ca mainan sajo, Ca takuik sakik hati untuak ka duo kalinyo, Lif”
“Alif janji ka Ca, kalau alif ndak ka mambuek ca sakik hati do, Alif nio sarius samo Ca, Alif nio Ca jadi nan terakhir untuak Alif. Ca lai nio kan mangawani Alif dari nol sampai Alif sukses bisuak? Kini kan awak samo-samo sadang kuliah jadi salamo awak kuliah ko samo-samo wak saliang menyemangati dan manolong satu samo lain, jan sampai hubungan iko malah jadi parusak tujuan awal awak pai ka kota iko yo,Ca! Bacinto buliah tapi maso depan jo cinto tu harus sajalan, Ca”
“Iyo Lif, Ca nio samo-samo jo alif, Ca nio mangawanan alif dari nol. Iyo Lif ca janji juo ka Alif kok hubungan iko ndak ka jadi parusak kuliah Ca do, malah Ca nio manjadian hubungan iko penyemangat Ca”.
Alah bajadi Keysa jo Alif dan urang baduo itu bajanji satu samo lain. Nan surang bajanji untuak indak mambuek sakik hati. nan surang lai bajanji kalau cinto jo maso depan itu harus sajalan, bacinto buliah tapi jan lupo jo pendidikan nan sadang dijalani.