Suatu hari Malin Deman pai ka Lubuak Kamuniang Gadiang. Alah manjadi rutinitas Malin
sahari-hari pai ka Lubuak untuak mamanciang. Tapi hari tu babeda. Katiko sadang sibuk
mamanciang, Malin bantuak mandanga suaro padusi bagarah-garah sambia main-main di aia.
Katiko Malin mandakek, kironyo ado tujuah bidadari nan main-main di aia di mudiak batang
aia. Bak mimpi ditangah hari. Malin tacangang-cangang mancaliak bidadari nan tujuah tu
main-main di aia. Kasadonyo tampak anggun dan rancak. Di antaro nan rancak-rancak tu, ado
ciek nan manarik paratian Malin.
Tabanyang niaik buruak di utak Malin. "Ondeh, sabana rancak padusi baju ijau tu. Apo den
suruakan sajo salendangnyo supayo indak bisa baliak ka Langik?" Kecek Malin dalam hati.
Tanpa bapikia labiah lanjuik, Malin mandakek ka salendang nan sadang dilatakkan di ateh batubatu. Malin maambiak salendang hijau nan cocok jo baju nan dipakai padusi nan manawan
hatinyo. Sasudah maambiak salendang, Malin langsuang babaliak ka tampeknyo mamanciang
dan manyuruak-an salendang saelok-eloknyo. Si Malin malanjuikan kagiatannyo mamanciang.
Bidadari nan tujuah tu masih sibuk main-main di aia jo basanang-sanang. Sampai akhianyo
langik mulai bawarna oranye, tandonyo hari lah samakin laruik. Sabalun talambek, Bidadari
mamutuihkan basiap-siap untuak babaliak ka Langik. Sasudah mangariangkan badannyo
katiko nak mamakai salendangnyo, Bidadari manamukan salah satu salendangnyo nan hilang,
yaitu salendang adiak bungsunyo, nan banamo Puti bungsu.
Si Puti Bungsu sangaik takajuik karano indak basuo salendangnyo. Inyo sangaik panik dan
mancari-cari selendangnyo kama-kama, dibantu dek anam urang akaknyo. Inyo cari-cari
daerah tampek inyo mandi dan juo manyisiah jalan ka hilia, mungkin alah tabaok dek aia dan
tatangkok di batu-batu. Namun, usaho inyo sio-sio dek indak juo basuo salendang tu. Si Puti
Bungsu mulai putuih aso dan aia matonyo samakin kareh. Dunsanak-dunsanaknyo ikuik sadiah
karano indak dapek mancari salendang Puti tu.
Kecek akaknyo nan paliang tuo, "Kama lai awak ka mancari salendang ko, diak? Lah kami
sisia sadonyo tampek disiko tapi salendang tu indak basuo. Apo nan harus akak kecekkan ka
Amak beko kalau lah di langik? iko salah akak nan maajak kalian main di Bumi. Maafan akak,
diak" kecek akak nan partamo sambia taisak-isak.
Samakin hari samakin kalam, Bidadarisamakin cameh baa caronyo adiak bungsunyo ka pulang
ka Langik. Sekilas, Si Puti Bungsu nampaknyo ado urang mamanciang di baliak batu-batu di
Hulu Sungai. Puti mandakek ka tampek tu. Puti basobok jo Malin Deman. “Maaf Da, buliah
ambo batanyo?”, kecek Puti Bungsu ka Malin Deman. “Iyo, ado apo tu, Diak?”, jawek Malin
Deman. “Ambo nio batanyo, lai nampak dek uda salendang hijau ambo di batu-batu di sinan?”
tanyo Puti Bungsu ka Malin Deman. "Maaf, Diak. Sajak ambo duduak di siko, indak nampak
salendang di sakitar siko." Jawek Malin Deman jo muko serius. "Apo sabana ndak nampak dek
uda salendang tu tatangkok atau tabao dek arus? Sabab ambo sabana paralu jo salendang tu
untuak bisa babaliak ka langik. Hari samakin kalam. Indak ado tampek tingga ambo di ateh
bumi ko. Dunsanak ambo jo akak-akak ambo alah nio pulang ka Langik. Kalau ambo indak
basobok jo salendang tu, ambo indak bisa pulang ka Kayangan jo akak-akak ambo." Kecek
Puti Bungsu panjang leba manjalehan ka Malin Deman. "Sungguah, Diak. Sajak tadi ambo
duduak disiko, jangankan salendang, ikan se ndak ado nampak lewat dek ambo disiko," kecek
Malin manjawek tanyo Puti Bungsu. Puti babaliak jo muko sadiah manahan aia mato ka tampek akak-akaknyo. "Diak, ambo minta
maaf. Lah samakin kalam ndak mungkin lai ambo manunda babaliak ka Kayangan. Mohon
maaf kito, Diak. Tapi baa lai, kami harus maninggaan adiak disiko surang. Cubo lah cari
salendang adiak tu dulu disiko sampai basuo. Kito tunggu adiak di Langik” kecek akak ka Puti
Bungsu sambia manahan aia mato. Baranam akak Si Puti Bungsu babaliak ka Kayangan. Si
puti bungsu hanyo bisa duduak baliak di ateh batu-batu. Puti Bungsu tu tamanuang dek
binguang kama ka pai. Baliau indak tawu doh jo umaik bumi ko.
Malin Deman nan sajak awal mamparatian anak bungsu tu, langsuang mandakek. Iyo,
manfaatkan kesempatan ko untuak marabuik hati putri bungsu. "Maaf, Diak, hari lah laruik,
sabanta lai ka sanjo. Takana dek ambo carito adiak nan mangatokan indak punyo apo-apo di
bumi ko. Karano itu, bialah ambo manolong adiak jo maagiah tampek tingga." kecek Malin ka
anak bungsu. Anak gadih bungsu hanyo maangguak-angguak tando inyo satuju jo kato-kato
Malin.
Malin maantakan anak bungsu ka rumah Mande Rubiah. Malin mangenalan Puti Bungsu ka
Mande Rubiah. Ndak lamo sasudah itu, akhianyo Malin manikah jo Puti Bungsu. Awalnyo
pernikahan mereka bajalan bahagia. Namun, sairiang bajalan wakatu, kabiasaan buruak Malin
mancogok baliak. Malin nan suko maadu ayam, bajudi, pamabuak, jarang pulang karano
bakumpua sampai pagi jo kawan-kawannyo.
Malin alah punyo anak surang. Paja tu banamo si Malin Duano. Wakatu tu Malin Duano sadang
lalok siang di rumah neneknyo, yaitu rumah Mande Rubiah. Mandeh Rubiah mancaliak
cucunyo sadang lalok, diagiahnyo salimuik. Indak disadari, kain nan diambiak dek Mande
Rubiah adolah salendang Puti Bungsu nan hilang katiko mandi di batang aia basamo akakakaknyo. Si Puti Bungsu nan lah salasai mamasak di dapua mulai masuak ka kamar jo niaik
lalok siang sabanta jo Malin Duano sambia manunggu Malin Deman pulang. Puti takajuik
mancaliak salimuik nan dipakai anaknyo. Bagageh nyo ambiak kain tu, nyo caliak elok-elok.
Katiko itu, Puti langsuang manangih karano manyadari kain tu indak panah ilang tapi lah
disuruakkan dek Malin Deman. Puti bagageh mandukuang anak nan sadang lalok tu kalua
rumah.
Katiko sadang di laman rumah, Puti basobok jo Bujang Karim. Puti manitipkan pasan ka
bujang Karim untuak disampaikan ka Melin Deman. "Bujang Karim. Tolong sampaikan pasan
den ka laki den. Salendang den nan pernah inyo suruakkan lah basuo. Kini den ka baliak ka
Kayangan, mambaok Malin Duano basamo-samo," kecek Si Puti Bungsu ka Bujang Karim.
“Jadih, puti, waden sampaikan ka Malin Deman,” kecek Bujang Karim, sudah tu Bujang Karim
bagageh mancari Malin Deman jo mukasuik manyampaikan pasan dari Puti Bungsu. Puti
Bungsu lansuang baliak ka Kayangan.
Bujang Karim basobok jo Malin Deman. Disampaikannyo pasan dari Puti Bungsu ka Malin
Deman. Mandanga itu, Malin Deman takajuik bana, lansuang bagageh pulang. Katiko Malin
Deman tibo di rumah, inyo langsuang manyisia sado biliak di rumah tu jo harapan basobok jo
anak jo bininyo. Tapi sadonyo sio-sio, bini jo anaknyo lah baliak ka Kayangan. Malin Deman
sangaik manyasa jo tindakannyo dalam maninggakan anak jo bininyo. Inyo maibo-ibo indak
takao di bakeh biliak lalok siang anaknyo. Nasi lah jadi bubua, bini jo anaknyo indak ka baliak ka bumi lai.
0 Comments