Pudarnyo Kato Nan Ampek Di Ranah Minang

Oleh : Muhammad Khairul

Bagi masyarakaik Minangkabau, adat adolah pegangan dalam bagaua dalam kahidupan sahari-hari. Adat dijadian sabagai peraturan hiduik yang mengikek urang pa urang dan masyarakaik untuak tunduk dan mematuhinyo. Selain adat istiadat yang ma atur tantang kabiasoan dan tradisi di tiok daerah, komponen adat lainnyo adalah limbago nan sapuluah. Limbago nan sapuluah adolah sabuah aturan adat yang khusus dan merupoan katantuan yang balaku untuak umum, elok di ranah Minang ataupun di rantau. Bagian aturan dalam limbago nan sapuluah tersebut adalah kato nan ampek. Kato nan ampek adolah aturan tata krama dalam bakomunikasi antaro sasamo masyarakaik Minang dari bebagai umua. Kato nan ampek maliputi kato-kato mandaki, kato mandata, kato melereang, kato manurun. 

Kato mandaki adolah baa caro kito bakomunikasi jo urang nan labiah gadang dari kito. Dilarang mamangia nyo jo sabutan namo sajo. Kato manurun adolah cari kito bakomunikasi jo urang nan labiah ketek dari kito. Kamudian Kato mandata adolah cari kito bakomunikasi jo urang nan samo gadang jo kito. Sadangkan kato malereang adolah caro bakomunikasi jo urang nan kito sagani.

Mampalajari adat jo budaya marupoan kewajiban kito sadonyo. "Anak ikan dimakan ikan, gadang ditabek anak tenggiri. Ameh bukan perakpun bukan, budi saketek rang haragoi". Artinya: Hubungan yang arek sasamo manusia indak karano ameh jo perak, tapi labiah di ikek jo budi yang elok. Sabaliaknyo bagi urang yang ndak tau kato nan ampek dalam bakomunikasi, samakin randah adabnyo (indak baradaik).

Zaman kini kato nan ampek indak banyak nan tau ditangah kaum milenial yang sedang barangok. Bahkan banyak anak-anak mudo minang kini yang indak tau jo kato kieh dan bahkan mangecek ka urang nan labiah gadang dari dirinyo acok indak ba alamaik, dan anak-anak nan baru ka gadang bisa ba “den” mangecek ka urang nan jauah labiah gadang dari pado dirinyo. Antah indak diajaan mamaknyo, indak pernah nio baraja tentang budaya surang, atau mungkin pengaruh teknologi yang sadang kambang-kambangnyo. Seharusnyo teknologi nan alah kambang dijadian ladang untuak mancari pengetahuan tentang adaik minang nan alah batebaran di dalamnyo jikok indak ado nan tuo-tuo tampek batanyo. 

Diharokan kapado gadih bujang di minangkabau untuak baparilaku, sopan santun dalam bagaua elok didalam lingkungan keluarga, sakolah dan di kahidupan sahari-hari agar taciptanyo keseimbangan dan keteraturan didalam nagari. Diharokan ka pemerintah Nagari, ninik mamak dan orang tuo untuak labiah manarapan adat Minangkabau kapado anak kamanakan supayo anak kamanakan bisa tau apo yang menjadi haknyo, elok jo buruak, apo yang buliah dilakuan atau yang manjadi pantangan didalam adat Minangkabau supayo terciptanyo kesejahteraan dalam suatu nagari. Kalau iko dipadiaan Minangkabau 5 sampai 10 tahun kamuko mungkin Minangkabau akan tingga kabau karano minangnyo alah hilang.1